१९ जेठ/अर्थ र व्यापार – बजेट सार्वजनिक भएपछि धेरै लगानीकर्ताको अपेक्षा बमोजिम सेयर बजार ह्वात्तै रन्किएर माथी जान सकेन । यस साताको पहिलो कारोबार दिन सोमबार सेयर बजार परिसूचक नेप्से १ दशमलब ६० अंकले बढेर २६ सय ९४ दशमलब ६६ विन्दुमा पुगेको छ ।
अघिल्लो दिनको तुलनामा यसदिन कारोबार रकम पनि बढेको छ । अघिल्लो दिन ८ अर्ब ५८ करोड रुपैयाँको कारोबार भएकोमा यसदिन ९ अर्ब २२ करोड ६३ लाख २२ हजार ९ सय ३३ रुपैयाँको सेयर कारोबार भएको छ ।
यसदिन कुल १ सय १५ वटा कम्पनीको सेयर मूल्य बढेको छ । १ सय ३३ वटा कम्पनीको सेयर मूल्य घटेको छ । सरकारले बजेट सार्वजनिक गरेपछिको पहिलो कारोबार दिन सोमबार जम्मा दुईवटा उपसमुहमा आकर्षण देखिएको छ ।
होटल तथा पर्यटन उपसमुहको सेयर मुल्य २.३९ प्रतिशत र लगानी उपसमुहको २.२८ प्रतिशतले बढेको छ । यी दुई उपसमुहको सेयरमुल्य बढ्नुमा बजेटको आवश्वासन प्रमुख कारण नै भएको लगानीकर्ताको अनुमान छ । अहिलेको बजेटमा होटल तथा रिसोर्टलाई उत्पादनमूलक उद्योगसरह आयकर छुट दिने घोषणा गरिएको छ । सोही कारण यो उपसमुहको सेयरमुल्य बढेको हो ।
यसैगरी, लगानी उपसमुहका सूचीकृत कम्पनी र संस्थागत लगानीकर्ताले राष्ट्रिय प्राथमिकता प्राप्त उद्योगको स्वःपुँजी, ऋणपत्र र अन्य धितोपत्रमा लगानी गर्न सहजीकरण गरिने व्यवस्था बजेटले गरेको छ । त्यसैले यसमा पनि केही आकर्षण देखिएको छ ।
यसदिन विकास बैंक ०.२९, फाइनान्स ०.१८, जीवन बीमा ०.२३ र अन्य ०.३६ प्रतिशत बढेको छ । दुई कम्पनी ओम मेगाश्री फर्मास्युटिकल्स र पियोर इनर्जीको मूल्य १० प्रतिशत बढ्यो । सप्तकोशी विकास बैंकको ८.३१, न्यादी हाइड्रोपावरको ७.२७ तथा कर्पोरेट डेभलपमेन्ट बैंकको ६.३५ प्रतिशतले सेयर मूल्य बढेको छ ।
यसदिन त्यस्तै बैंकिङ उपसमुहकको ०.५९ प्रतिशत , हाइड्रोपावर ०.३५, उत्पादन तथा प्रशोधन ०.३८, माइक्रोफाइनान्स ०.१२, निर्जीवन बीमा ०.१६ तथा व्यापार उपसमुहको सेयरमूलय ०.३५ प्रतिशतले घटेको छ । भूगोल इनर्जीको मूल्य ६.४५ प्रतिशत घट्यो । बोटलर्स नेपाल बालाजुको ३.२० तथा विन नेपाल लघुवित्तको ३.०४ प्रतिशत घट्यो ।
यसदिन धेरै कारोबार भएका पाँच कम्पनीहरुमा ङादी ग्रुप, राधि विद्युत्, युनिभर्सल पावर, एचआईडीसीएल र बुटवल पावर क्रमशः अगाडि रहे ।
समग्रमा यसदिन कारोबारमा आएका होटल तथा पर्यटन, इन्भेष्टमेन्ट, विकास बैंक, फाइनान्स, लाइफ इन्स्योरेन्स, म्युचुअल फण्ड र अन्य सूचकले बजार बढाएका हुन् ।