५ माघ/अर्थ र व्यापार – यस साताको दोस्रो कारोबार दिन सोमबार पनि सेयर बजारको परिसूचक नेप्से २९ दशमलब ८७ अंकले बढेको छ । दोहोरो अंकको वृद्धिपछि नेप्से २७ सय २७ दशमलब ९१ विन्दुमा कायम भएको छ । नेप्से परिसूचकसँगै यसदिन कारोबार रकम पनि ह्वात्तै बढेको छ ।
सोमबार १० अर्ब ४ करोड ९६ लाख ५४ हजार ८ सय ३२ रुपैयाँको सेयर कारोबार भएको छ । अघिल्लो कारोबारदिन ९ अर्ब ४७ करोड रुपैयाँको सेयर कारोबार भएको थियो ।
कारोबारमा आएका विभिन्न कम्पनीहरु मध्ये १ सय ६६ वटा कम्पनीको सेयर मूल्य बढ्दा ७४ वटा कम्पनीको सेयर मुल्य घटेको छ भने ४ वटा कम्पनीको सेयर मुल्य स्थिर रहेको छ । यसदिन बैंकिङ उपसमुहमा आएको उल्लेख्य वृद्धिका कारण समग्र सेयर बजारलाई बढाएको र सेयर कारोबार रकम पनि बढेको हो ।

नेपाल स्टक एक्सचेन्जका अनुसार सेयर बजारमा पूँजीकरणका आधारमा सबैभन्दा ठूलो उपसमुह बैंकिङ क्षेत्रको प्रभाव बढी पर्दछ । यसदिन बैंकिङ उपसमुहको सेयर मुल्य सूचक २ दशमलब १६ प्रतिशत बढेको छ । १३ वटा उपसमुह मध्ये यसदिन सबैभन्दा धेरै माइक्रोफाइनान्स उपसमुहको सेयर मुल्य २ दशमलब ४५ प्रतिशतले बढेको छ , त्यसपछि अन्य उपसमूहको सेयर मुल्य २ दशमलब ४७ प्रतिशतले बढेको छ । यसैगरी, विकास बैंक उपसमुहको सुन्य दशमलब ३३ प्रतिशत, होटल तथा पर्यटन उपसमुहको २ दशमलब २९ प्रतिशत, लगानी उपसमुहको सुन्य दशमलब २० प्रतिशत, जीवन बीमा उपसमुहको सुन्य दशमलब ८९ प्रतिशत, उत्पादन उपसमुहको सुन्य दशमलब ७७ प्रतिशत, निर्जीवन बीमा उपसमुहको सेयर मुल्य १ दशमलब ०७ प्रतिशतले बढेको छ ।

सोमबार ६ वटा कम्पनीको सेयर मूल्य १० प्रतिशतले बढेको छ । १० प्रतिशतले सेयर मुल्य बढेका कम्पनीहरुमा विन नेपाल लघुवित्त, गुराँस लघुवित्त, कुथेली बुखरी स्मल हाइड्रोपावर, एक्सल डेभलपमेन्ट बैंक, गार्डियन माइक्रोलाइफ इन्स्योरेन्स र दिव्यश्वरी हाइड्रोपावर रहेका छन् । भर्खर नेप्सेमा सूचीकृत भएको गार्डियन माइक्रोलाइफ इन्स्योरेन्सको सेयर मूल्य बढेर प्रतिकित्ता ५ सय ८६ रुपैयाँ ३० पैसा पुगेको छ ।
यसदिन सप्तकोशी विकास बैंकको सेयर मूल्य सर्वाधिक १० प्रतिशतले नै घटेको छ । सेन्ट्रल फाइनान्सको ४.५ प्रतिशत , ग्रीन डेभलपमेन्टको ४.२ प्रतिशत र बेस्ट फाइनान्सको ३.८ प्रतिशतले सेयर मूल्य घटेको छ । यसैगरी, व्यापार उपसमुहको १ दशमलब २७ प्रतिशत, हाइड्रोपावर उपसमुहको सुन्य दशमलब १५ प्रतिशत र फाइनान्स उपसमुहको सुन्य दशमलब ८४ प्रतिशतले सेयर मुल्य घटेको छ । कारोबार रकमका आधारमा नेपाल पुनर्बीमा कम्पनी, सीईडीबी होल्डिङ्स, एनआरएन इन्फ्रास्ट्रक्चर, रिलायन्स फाइनान्स र युनाइटेड इदी मर्दी हाइड्रोपावर क्रमशः अगाडि रहेको छ ।