१४ असोज/अर्थ र व्यापार – सेयर बजार बढेर सोमबार नेप्से २५सय अंक नाघेको छ । अघिल्लो दिनको तुलनामा नेप्से परिसूचक ४४ दशमलब ४५ अंकले बढेर २५ सय ०८ विन्दुमा कायम भएको हो ।
नेप्से परिसूचक बढ्दा करोबार रकम भने केही घटेको छ । अघिल्लो दिन ४ अर्ब ५ करोड रुपैयाँको कारोबार भएकोमा यसदिन ३ अर्ब ७१ करोड रुपैयाँको मात्र कारोबार भएको छ ।
यसदिन कुल २ सय १० वटा कम्पनीको मूल्य बढ्दा ३३ कम्पनीको मुल्य घट्यो भने एउटाको स्थिर रह्यो । म्युचुअल फन्डबाहेक सबै क्षेत्रका सूचक बढे । बैंकिङ १.१८, विकास बैंक १.९३, फाइनान्स ४.१९, होटल तथा पर्यटन ३.२८, हाइड्रोपावर १.२२, लगानी २.४५, जीवन बीमा १.७८, उत्पादन ३.८३, माइक्रोफाइनान्स १.८५, निर्जीवन बीमा ०.७१, अन्य समुह २.३७ तथा व्यापार समुह १.५२ प्रतिशतले बढेका छन् ।
यसदिन मूल्य धेरै बढेका १० कम्पनीमा ४ वटा सिमेन्ट कम्पनी रहेका छन । यसदिन सूचीकृत चारवटै सिमेन्ट कम्पनी मूल्य उच्च दरमा बढेका टप १० कम्पनीमा परे । सीईडीबी हाइड्रोपावरको १० प्रतिशत , युनाइटेड मोदी हाइड्रोको ९.५ प्रतिशत , सर्वोत्तम सिमेन्टको ९.४ प्रतिशत , सोनापुर सिमेन्टको ९.१ प्रतिशत , शिवम् सिमेन्टको ७.९ प्रतिशत , माहुली लघुवित्तको ७.३ प्रतिशत , हाथवे इन्भेस्टमेन्टको ७.१ प्रतिशत, घोराही सिमेन्टको ६.८ प्रतिशत मूल्य बढ्यो ।
दसैँतिहारपछि निर्माण क्षेत्र चलायमान हुने संकेतका कारण लगानीकर्ता यस क्षेत्रमा मोडिएका छन् । बाढीपहिरोले क्षति पु¥याएका संरचना निर्माणका क्रममा पनि सिमेन्टको माग बढ्ने भएकाले यस क्षेत्रमा लगानी आकर्षण देखिएको हो ।
अघिल्लो दिन पनि यिनै सिमेन्ट कम्पनीको मूल्यकै कारण समग्र बजार घटे पनि उत्पादन क्षेत्र बढेको थियो । यस दिन एनएलजी इन्स्योरेन्सको मूल्य ४.६ प्रतिशत घट्यो । त्यस्तै इङ्वा हाइड्रोपावरको मूल्य ४.१, अपर स्याङ्गे हाइड्रोको ३.९, सगरमाथा जलविद्युतका् ३.२ प्रतिशत मूल्य घट्यो । कारोबार रकमका आधारमा सीईडीबी हाइड्रोपावर, सर्वोत्तम सिमेन्ट, शिवम् सिमेन्ट, नेपाल फाइनान्स र हिमालयन रिइन्स्योरेन्स क्रमशः अगाडि रहेका छन् ।