४ बैशाख/अर्थ र व्यापार – नेपाल वायुसेवा निगमले अन्तर्राष्ट्रिय उडानका लागि खरिद गरेका दुई न्यारोबडी र दुई वाइडबडी जहाजको किस्ता भुक्तानी गरेको छ । कर्मचारी सञ्चयकोष र नागरिक लगानीकोषबाट लिएको ऋण दायित्वमध्ये दुई न्यारोबडी जहाजको चैत महिनाको किस्ताबापत् पूरा र दुई वाइडबडी जहाजकोे आंशिक गरी ५३ करोड ९ लाख ५५ हजार २ सय ८१ रुपैयाँ भुक्तानी गरेको हो ।
निगमको व्यवस्थापन वर्तमान नेतृत्वले सम्हालेपश्चात् निगमले चैतसम्मको अवधिमा ५ अर्ब ३६ करोड ६६ लाख ८६ हजार ९ सय ६८ रुपैयाँ किस्ता रकम भुक्तानी गरेको छ ।
साथै, विश्वव्यापी कोरोना भाइरसको कारण निगमको व्यापारमा समेत प्रतिकूल असर परेकाले सो असर रहेको अवधिको ब्याजको ब्याज, हर्जाना र पेनल छुट गरी सहयोग गरिदिन एवं किस्ताको संख्या वृद्धि गरेर ऋण दायित्व भुक्तनीलाई सहजीकरण गरिदिनसमेत निगमले कर्मचारी सञ्चयकोष र नागरिक लगानीकोषलाई अनुरोधपत्र पठाएको र यस सम्बन्धमा छलफलसमेत भइरहेको जनाएको छ ।