१३ चैत/अर्थ र व्यापार – वसन्त ऋतुमा हुने हिमाल आरोहणका लागि परमिट जारी गर्न थालिएको छ । पर्यटन विभागका अनुसार सोमबार पहिलो अनुमति जारी भएको छ । यस दिन सगरमाथाका लागि ८ जनाको एक आरोहण दलले अनुमति लिएको छ ।
सगरमाथाबाहेक अन्नपूर्ण प्रथम, अमादब्दम, हिमलुङ र जुगल ३ हिमाल आरोहणका लागि परमिट जारी भएका छन् । यस दिन कुल ४६ जनाले आरोहण अनुमति लिएको विभागले जनाएको छ ।
अहिले हिमालमा जाने आरोहण दलका सदस्यहरुले आफ्नो तयारी गरिरहेका छन् । नेपालमा सामान्यतया जेठ महिनाको पहिलो साताबाट बढी आरोहण हुने गर्छ । सगरमाथा चढ्न वसन्त ऋतु मुख्य सिजन मानिन्छ । सोहीकारण सगरमाथा हिमालमा बढी आरोहण अनुमति जारी हुने गर्छ ।
यो सिजनको आरोहण व्यवस्थित गर्न खुम्बु पासाङ ल्हामु गाउँपालिकाले समेत विभिन्न नियम बनाएको छ । जसमा हिमाल आरोहणमा जानेले दिसापिसाब फिर्ता ल्याउनुपर्नेसम्मका नियम बताएका छन् ।