१२ साउन/अर्थ र व्यापार – हवाई टिकटमा चालु आर्थिक वर्ष २०८०/८१ बाट लागू भएको मूल्य अभिवृद्धि कर (भ्याट) खारेजीको माग गर्दै सम्बन्धीत पर्यटन व्यवसायी सर्वोच्च अदालत पुगेका छन् ।
नेपाल एसोसिएसन अफ टुर एण्ड ट्राभल एजेन्ट्स (नाट्टा) ले बिहीबार सर्वोच्च अदालतमा पुगेर यो व्यवस्था खारेजीको माग गर्दै रिट दायर गरेको हो ।
हवाई सेवामा यसरी भ्याट लगाउँदा नेपालको पर्यटनसँग सम्बन्धित सेवा महँगो हुने व्यवसायीको धारणा छ ।
यसैगरि, उनीहरुले अर्कोतर्फ आएटा र आईकाओको प्रावधान अनुसार पनि अन्तर्राष्ट्रिय हवाई सेवा शून्य भ्याटमा आधारित हुनुपर्ने भएकाले यसलाई सच्याउन माग गरिएको बताएका छन ।
नाट्टाका अध्यक्ष रमेश थापाले यस्तो जानकारी गराएका हुन । उनले यसअघि आफुहरुले धेरैपटक सम्बन्धीत निकाय तथा सरकारसँग यो निणर्य फिर्ता गर्न आग्रह गर्दा अहिले आफुहरु अदालत जान बाध्य भएको बताए । उनले अझै यो समस्या समाधान गर्न विभिन्न निकायसँग छलफल र सहकार्य गर्न तयार रहेको समेत बताए ।

उनले नाट्टाले अध्यक्ष परिषद, नाट्टा सल्लाहकारहरु, कानुन व्यवसायी तथा कर परामर्शदाताहरुको सल्लाह सुझाव र नाट्टा बोर्डको निणर्यबाट कानुनी उपचारकालागि सर्वोच्च अदालत गएको बताए ।