१७ भदौ/अर्थ र व्यापार – कोरोना विश्व महामारीपछि नराम्रोसित थला परेको मुलुकको पर्यटन क्षेत्रमा हाल विस्तारै सुधारको संकेत देदिएको छ ।
सन् २०२२ को प्रारम्भदेखि नै नेपाल भित्रिने पर्यटक आगमन संख्यामा सुधार देखिन थालेको हो । सन् २०२२ यो ८ औं महिना (अगष्ट)मा समेत यस्तो बृद्धि कायम रह्यो ।
अध्यागमन विभागका अनुसार अगष्ट २०२२ मा मात्र ४१ हजार ३०४ जना विदेशी नागरिक नेपाल भित्रिएका छन् । यससँगै सन् २०२२ को जनवरीदेखि अगष्ट महिनासम्म कुल ३ लाख २६ हजार ६६७ जना पर्यटक नेपाल भित्रिएको विभागको तथ्यांकले देखाएको छ ।
अगष्ट महिना नेपालमा वर्षायाम रहने सिजन हो । सोहीकारण सामान्यतया कम पर्यटक आउने महिनामा गनिन्छ । कोरोना महामारी अघि सन् २०१९ मा अगष्ट महिनामा ९२ हजार ६०४ जना पर्यटक नेपाल भित्रिएका थिए । सन् २०२० मा ५८४ जना मात्र आउने वातावरण बनेको थियो । तर, सोही बेलादेखि सरु भएको कोरोना विश्व महामारिले विगत झन्डै तिनवर्ष पर्यटन क्षेत्र ठप्प जस्तै भएको थियो ।

सन् २०२१ को अगष्ट महिनामा भने ६ हजार ९३ जना पर्यटक नेपाल आएको तथ्यांक रहेको छ । पर्यटनमा सेप्टेम्बरबाट भने नयाँ सिजन मानिन्छ । यस सिजनका लागि पर्यटकको अग्रिम बुकिङले व्यवसायी उत्साहित छन् ।
कोभिड महामारीपछि भारतीय पर्यटकको आगमनमा उत्साह देखिएको छ । तथ्यांक अनुसार अगष्ट महिनामा मात्र १६ हजार १४७ भारतीय नेपाल आएका छन् । अघिल्लो महिना (जुलाई)मा १७ हजार २९९ जना भारतीय पर्यटक आएका थिए ।
अगष्टमा अमेरिकाबाट ४ हजार ६६ जना पर्यटक नेपाल आएका छन् । यो दोस्रो ठूलो संख्या हो । जुलाईमा अमेरिकाबाट ५ हजार २२८ जना पर्यटक नेपाल आएका थिए । बेलायतबाट अगष्टमा २ हजार ८२६, बंगलादेशबाट १ हजार ७५१ र चीनबाट १ हजार २८९ जना पर्यटक नेपाल आएको विभागको तथ्यांकमा उल्लेख छ ।