४ फागुन/अर्थ र व्यापार– त्रिभुवन अन्तर्राष्ट्रिय विमानस्थलमा प्रवेश गर्दा अब अनिवार्य हवाई टिकटको प्रिन्ट कागज नै देखाउनुपर्ने भएको छ । यसअघि आफ्नो साथमा भएका मोबाईलमा हवाई टिकट वा पीएनआर नम्बर देखाएर सजिलै प्रवेश गर्न पाईनेमा अब हवाई यात्रुले आफुले खरिद गरेको हवाई टिकटको प्रिन्ट कागज नै अनिवार्य देखाउनुपर्ने भएको छ ।
यो नयाँ नियम पालना नगर्नेहरुकालागि विमानस्थल भित्र प्रवेश गर्न नदिईने त्रिभुवन अन्तर्राष्ट्रिय विमानस्थल कार्यालयले जनाएको छ । विमानस्थल कार्यालयले मंगलबार सूचना जारि गर्दै सम्बन्धीत वायुसेवा कम्पनीहरु तथा सरोकारवालाहरुलाई यस्तो नयाँ नियमको बारेमा जानकारि गराएको हो ।
विमानस्थल कार्यालयले सुरक्षाका कारण भन्दै विमानस्थल प्रहरीले गरेको आग्रह अनुसार अबदेखि डिजिटल हवाई टिकट मात्र देखाएर नहुने र टिकटको प्रिन्ट कागज नै अनिवार्य देखाउनुपर्ने नयाँ नियम लागु गर्न लागिएको बताएको छ ।
त्रिभुवन अन्तर्राष्ट्रिय विमानस्थल कार्यालयको विमानस्थल संचालन विभागका निर्देशक टेकनाथ सिटौलाले विमानस्थल कार्यालय व्यवस्थापनले परिवर्तन गरेको यस्तो नयाँ नियम आगामी ७ फागुनदेखि लागू हुने जानकारि दिए । उनले विमानस्थल प्रवेशमा अनावस्यक मान्छे प्रवेश नगरुन भनेर थप सुरक्षा व्यवस्थाकालगि अब हवाई टिकटको पेपर प्रिन्ट नै देखाउनुपर्ने नियम लागु गर्न लागिएको बताए ।
सम्बन्धीत वायुसेवा कम्पनीहरु र नेपाल नागरिक उड्डयन प्राधिकरणसँगको छलफलपछि यो निर्णय गरिएको विमानस्थल प्रहरीले जनाएको छ । विमानस्थलभित्र प्रवेश गर्ने हवाई यात्रुकालागि विमानस्थलका कर्मचारीहरुलाई हवाई टिकट हेर्न सजिलो होस् भनेर यस्तो नियम लागू गरिएको विमानस्थल प्रहरीले जनाएको छ । वायुसेवा कम्पनीहरुले विमानस्थलमा प्रिन्टेड टिकेट अनिवार्य गरिएकाले सोही अनुसार चेकइन गर्न सूचना जारी गरेका छन् ।
बढ्दो सूचना प्रविधिको विस्तारसँगै अहिले मोबाइल वालेट, एयरलाइन्सका एप वा अन्य साईटबाट अनलाइन बुकिङ गरेपछि टिकट प्राप्त भएको एसएमएस वा इमेल आउँछ । विमानस्थल सुरक्षा जाँचमा मोबाइलमा नम्बर वा हवाई टिकट देखाएर सहज रुपमा भित्र पस्न सजिलो थियो । यस्तो प्रिन्ट गरिएको हवाई टिकटको झमेला बिना विमानस्थल प्रवेश गर्दा निकै सहज र आनन्द मानिरहेका हवाई यात्रुकालागि यो नयाँ नियम चित्त बुझ्दो छैन । उनीहरुलाई अन्तर्राष्ट्रिय विमानस्थलको आन्तरिक टर्मिनलमा प्रवेश गर्दा अनिवार्य प्रिन्टेड टिकट नै देखाउनुपर्ने नयाँ व्यवस्था झमेलायुक्त लागेको छ ।
विमानस्थल सुरक्षाका कारण भन्दै विमानस्थल प्रहरीले हाल संचालित डिजिटल प्रविधीको हवाई टिकटको सुविधामा प्रतिवन्ध लगाउने निणर्य गरेको हो । विमानस्थल व्यवस्थापनको यो नयाँ नियम अनुसार डिजिटल टिकटबाट सहज प्रवेश पाइरहेका हवाई यात्रुले अब आफुसँग भएको हवाई टिकटलाई प्रिन्ट गराएर कागजै बोक्नु पर्ने झमेला थपिएको छ । विमानस्थलको सुरक्षा मजबुत गराउने उद्देश्यले हवाई यात्रुलाई प्रिन्टेड हवाई टिकट देखाउन अनिवार्य गरिएको विमानस्थल प्रहरीको भनाई छ । यस नयाँ नियम अनुसार अब जति हतार भए पनि विमानस्थल प्रवेश गर्ने हवाई यात्रुले अनिवार्य प्रिन्ट गराएको हवाई टिकट साथमा बोक्नु पर्नेछ ।
डिजिटल टिकटलाई मान्यता नदिने भन्दा पनि विमानस्थल भित्र पस्ने यात्रुको हवाई टिकट हेर्न सजिलो होस् भनेर यो नयाँ नियम लागू गरेको जानकारि गराउँदै विमानस्थल का प्रहरी एसएसपी भीम ढकालले भने, ‘सेक्युरिटी चेक हुने ठाउँमा यसो फोन देखाएर कुदिहाल्ने देखियो। फोन एकै आकारको हुँदैन। प्रष्ट नबुझिने हुँदा वायुसेवा कम्पनीहरु र प्राधिकरणसँगको छलफलपछि यो निर्णय गरिएको हो ।’
टिकट लिएका यात्रुले प्रिन्ट गर्न झन्झट मान्दा अहिले यस विमानस्थलको सुरक्षा कमजोर हुने दाबी गर्दै उनले विमानस्थलको हवाई सुरक्षा चेकजाँचलाई थप प्रभावकारी र व्यवस्थित बनाउनका लागि अब प्रिन्ट भएको हवाइृ टिकट नै उचित रहेकाले यस्तो नयाँ नियम लागु गर्न लागिएको बताए ।
हाल केही मान्छे विमानस्थल प्रवेशको पास पनि नभएका र हवाई टिकट समेत नलिएर हातमा मोबाईल देखाएर भित्र छिरेको पाईएपछि यो नयाँ नियम लागू गर्न लागिएको बताउँदै ढकालले भने, ‘अनावश्यक मान्छेलाई विमानस्थल जस्तो संवेदनशील क्षेत्रमा पस्नु सुरक्षा दृष्टिकोणले राम्रो होइन ।’
उनले अब हवाई यात्रुले वायुसेवा कम्पनीले दिएको समयमैै विमानस्थल आइपुगेको अवस्थामा भने यो झन्झट नरहने बताए । विमानस्थल कार्यालयले मंगलबार जारि गरेको यस्तो नयाँ नियम लागु गराउने निर्णयप्रति भने आन्तरिक निजी वायुसेवा कम्पनीहरु बुद्ध, यती, श्री, सौर्य, गुण लगायतका नियमित उडान भर्दै आएका वायुसेवा कम्पनीहरुले हवाई यात्रुलाई असुविधा हुने भन्दै आपत्ति जनाएका छन् ।
उनीहरुले प्रविधिमैत्री युगमा विमानस्थल प्रवेशमा पुनः प्रिन्टेड हवाई टिकट बोक्न अनिवार्य गराउँदा विमानस्थलको ट्रमिनलमा थप भीड बढ्ने र हवाई यात्रुलाई झन्झट हुने बताएका छन् ।
सम्बन्धीत वायुसेवा कम्पनीहरुले अधिकांश यात्रुले अनलाइनबाटै हवाई टिकट खरिद गरि आफ्नो स्मार्ट फोनमा लिएर आउने गरिरहेको अवस्थामा आधुनिक प्रविधिको युगलाई नै चुनौति दिने गरि पुनः पुरानो ढुंगे युगमा फर्किने यस्तो नियम लागू गर्नु उचित नभएको बताएका छन । निजी वायुसेवा कम्पनीहरुको छाता संस्था वायुसेवा सञ्चालक संघ–नेपालका एक सदस्यले भने, ‘यो नियम प्रविधिको युगलाई ढुंगे युगमा फर्काउने नियत हो।’ हवाई सेवा प्रयोगकर्ता आफैंमा सुरक्षाप्रति संवेदनशील हुने भएकाले लाईन लागेर प्रवेश गरिरहेका हुन्छन्। यस्तो अवस्थामा प्रिन्ट भएको टिकट अनिवार्य गर्नु भन्दा अन्य सुरक्षा सहजीकरणका उपाय खोज्नुपर्ने तर्फ सरकारको ध्यान जानुपर्छ । ’