२९ पुस/ अर्थ र व्यापार - माथिल्लो तामाकोशीको प्राथमिक शेयर ७४ रुपैयाँदेखि २२४ रुपैयाँको रेन्जमा कारोबार हुने भएको छ । बिहीबार सूचिकृत भएको तामाकोशीको शेयर पहिलो पटक कारोबार गर्न ७४.८९ रुपैयाँदेखि २२४.६७ रुपैयाँको विचको रेञ्ज नेप्सेले तय गरेको छ ।

कम्पनीको शेयर “upper“ सिम्बोल मार्फत दोस्रो बजारमा कारोबार गर्न सकिने छ । दोस्रो बजारमा शेयर कारोबार गर्न नेप्सेले निश्चित सिम्बोल दिने गर्छ । सोहि अनुरुप लगानीकर्ताले शेयर कारोबार गर्न सक्छन् ।  कम्पनीले बिहीबार नेपाल स्टक एक्सचेन्जमा १० करोड ५९ लाख कित्ता शेयर सूचिकृत गरेको थियो । त्यही शेयर दोस्रो बजारमा आइतबारदेखि कारोबार गर्न पाइनेछ। जसमध्ये प्रभावित क्षेत्रका लागि निष्काशन गरेको १० प्रतिशत शेयर तीन वर्षका लागि लक गरिएको छ । 

कम्पनीले सञ्चयकर्ताको लागि तीन वर्ष अगाडि तीन वर्षकै लागि लकिङ पिरियड तोकेर शेयर जारी गरेको थियो । तर सर्वसाधारणलाई शेयर जारी गरि दोस्रो बजारमा सूचिकृत हुँदासम्म तीन वर्ष वितिसकेकोले कर्मचारी सञ्चय कोषका सञ्चयकर्ताले पनि दोस्रो बजारमा कारोबार गर्न सक्ने छन् । सञ्चयकर्ताको शेयर दोस्रो बजारमा सूचिकृत भए पनि डिम्याट नभएको हुँदा सबैले गर्न पाउँदैनन् । कम्पनीले केही दिनमा नै डिम्याटको प्रकृया अगाडि बढाउने जनाएको छ । डिम्याट भएपछि मात्रै शेयरधनीहरुले शेयर खरिद बिक्री गर्न पाउने छन् । 

कम्पनीको तीन चरणमा सार्वजनिक शेयर जारी गरेको थियो । पछिल्लो समय सर्वसाधारणको लागि प्राथमिक शेयर जारी गरेसँगै कम्पनीको शेयर कारोबार हुने भएको हो । दोस्रो बजारमा सूचिकृत भएसँगै माथिल्लो तामाकोशी सबैभन्दा धेरै शेयरधनी भएको कम्पनी हुने छ । कम्पनीमा ८ लाखभन्दा धेरै शेयरधनी हुने छन् ।