२३ माघ÷अर्थ र व्यापार - तरलता अभावको प्रभाव सेयर बजारमा देखिन थालेको छ। बिस्तारै कारोबार रकममा गिरावट आउन थालेको छ। बिहीबार अर्बमाथिका सेयर किनबेच भएपनि विगतको तुलनामा कारोबार रकम निरन्तर घटिरहेको छ।

बजार ८.६७ अंकले घटेको छ भने कारोबार रकम एक अर्ब ३ करोड रुपैयाँमा खुम्चिएको छ। १७५ वटा कम्पनीको सेयर किनबेच भएकोमा ३० वटाको मात्र मूल्य बढेको छ। १२३ वटा कम्पनीको मूल्य घटेको छ।

राष्ट्र बैंकका अनुसार अहिले बजारमा ३० अर्ब हाराहारी तरलता छ। यसमध्ये १० अर्ब राष्ट्र बैंकले उपलब्ध गराएको पैसा हो। यो झिक्ने हो भने बजारमा २० अर्ब मात्र तरलता छ। तरलता कम हुँदै गएपछि बजारमा कारोबार रकम घट्दै गएको हो।

उत्पादन तथा प्रशोधन र जीवन बीमा कम्पनीबाहेक सबै उपसूचक ओरालो लागेका छन्। बैंकिङ समूह साढे ८ अंकले घटेको छ। 

साताको अन्तिम कारोबार दिन प्रभु बैंक, गुँरास लाइफ इन्स्योरेन्स, ग्लोबल आइएमइ बैंकमा लगानीकर्ता सक्रिय देखिएका थिए। बजारमा सेयरको माग भने सिभिल बैंक, नेपाल बैंक, प्रभु बैंक, ग्लोबल आइएमइ बैंक र एनसिसी बैंकको धेरै थियो।

सिभिलको माग एक लाख ५ हजार ३६३ कित्ता हुँदा आपूर्ति भने ८९ हजार ८४७ कित्ता मात्र थियो। यसपछि बढि आपूर्ति सेञ्चुरी बैंकको ५० हजार ७८० कित्ता भएको थियो। मागभन्दा आपूर्ति कम हुँदासमेत सिभिल बैंकको सेयर मूल्य ३.७२ प्रतिशतले घटेको छ।

ग्रिन डेभलपमेन्ट बैंक, समृद्धि फाइनान्स र सपोर्ट माइक्रोफाइनान्सको सेयर १० प्रतिशतका दरले बढेको छ। नेपाल फाइनान्सको सेयर साढे ९ प्रतिशतले घटेको छ।