१४ फागुन /अर्थ र व्यापार - शिवम् सिमेन्टको आईपिओ बिक्री फागुन १४ गते मंगलबार बैंकिङ्ग समय पश्चात बन्द हुने कम्पनीको शेयर निष्काशन तथा बिक्री प्रबन्धक सिद्धार्थ क्यापिटलले जनाएको छ । सोमबारसम्म कम्पनीको शेयरमा आवश्यक आवेदन परेपछि मंगलबार आईपिओ बिक्री बन्द गरिने भएको हो ।

फागुन १३ गते सोमबार बेलुका सम्ममा सर्वसाधारण र स्थानीय गरि कूल एक अर्ब ४८ करोड १ लाख ५२ हजार रूपैयाँ बराबरको आवेदन परेको बिक्री प्रबन्धकले जनाएको छ । बिक्री प्रबन्धक सिद्धार्थ क्यापिटलका अनुसार सर्वसाधारण तर्फ ४६ हजार ४६ आवेदनबाट एक अर्ब ४० करोड ६४ लाख ३६ हजार रूपैयाँ बराबरको ४६ लाख ८८ हजार १२० कित्ता शेयर माग भएको छ । सर्वसाधारणमा अंकित मूल्य एक सय रूपैयाँमा २०० प्रिमियम सहित प्रतिकित्ता ३०० रूपैयाँका दरले ४१ लाख २० हजार कित्ता शेयर निष्काशन गरेको हो ।

यसैगरि स्थानीयतर्फ ७३६ करोड ७१ लाख ६० हजार रुपैयाँ बराबरको माग परेको छ । ७८५ आवेदनबाट ३ लाख ६८ हजार ५८० कित्ता शेयरमा आवेदन परेको बिक्री प्रबन्धक सिद्धार्थ क्यापिटले जनाएको छ । मकवानपुरबासीका लागि कम्पनीले अंकित मूल्य एक सय रूपैयाँमा १०० प्रिमियम सहित प्रतिकित्ता २०० रूपैयाँका दरले ५ लाख ७९ हजार ६४० कित्ता शेयर निष्काशन गरेको हो । स्थानीयतर्फ भने २ लाख ११ हजार ६० कित्ता बिक्री हुन बाँकी छ ।

स्थानीयतर्फ बिक्री हुन बाँकी रहेपनि सर्वसाधारण तर्फ ५ लाख ६८ हजार १२० कित्ता शेयर अधिक माग भएकाले निष्काशन बन्द गरिएको हो । आईपिओमा सर्वसाधारण तथा मकवानपुरबासीले कम्तीमा ५० कित्ता तथा अधिकतम कित्ताको हकमा मकवानपुरबासीले ५ लाख ७९ हजार ६४० कित्ता र सर्वसाधारणले ४४ लाख कित्तासम्म आवेदन गर्न सकिने व्यवस्था छ । इच्छुक लगानीकर्ताले मेरो शेयर सफ्टवेयर मार्फत आईपिओमा आवेदन गर्न सक्नेछन् भने यसका अलवा नेपाल धितोपत्र बोर्डबाट आश्वा सदस्य अनुमति प्राप्त सम्पूर्ण बैंक तथा वित्तीय संस्था र तीनका सबै शाखा कार्यालय मार्फत सि आश्वा प्रणाली मार्फत ७७ जिल्लाबाटै निवेदन दिन सकिने व्यवस्था रहेको छ ।

आयोजना प्रभावितले भने मकवानपुरबासी रहेको यकिन हुने नागरिकता वा जन्मदर्ताको प्रमाणपत्रका आधारमा सि आश्वा प्रणाली मार्फत निवेदन गर्न सक्नेछन् । कम्पनीको शेयर निष्काशन तथा बिक्री प्रवन्धकमा सिद्धार्थ क्यापिटल लिमिटेड रहेको छ । इक्रा नेपाल लिमिटेडले कम्पनीको शेयरलाई क्रेडिट रेटिङ्ग ग्रेड ३ प्लस प्रदान गरेको छ । जसले कम्पनीको वित्तीय अवस्था औसत रहेको जनाउँछ। शिवम् सिमेन्टको आईपिओमा एनआईबिएल एस क्यापिटल, ग्लोबल आईएमई क्यापिटल र सिबिआईएल क्यापिटल लिमिटेडले शेयर प्रत्याभूति गरेका छन् । शिवम् सिमेन्टले फागुन ६ गते देखि वास्तविक कम्पनीको रूपमा सिमेन्ट उद्योगको रूपमा पहिलो पटक प्रिमियम मूल्यमा साधारण शेयर निष्काशन गरेको थियो।