८ पुस / अर्थ र व्यापार - बजार सुधारको संकेत देखिँदै गर्दा दोस्रो बजारमा कारोबार रकम बढ्न थालेको छ। बाणिज्य बैंकको शेयरमा खासै आकर्षण नदेखिए पनि उत्पादन तथा प्रशोधन, बीमा, लघुवित्तलगायतका कम्पनीको बजार मूल्य उक्लिँदा कारोबार रकम बढेको हो। 

बजार सुधार हुनेरनहुने भन्ने दोधारमा रहेका लगानीकर्ता पछिल्लो समय थोरै कित्ताले बजार बढाउने र आफ्नो शेयर बिक्री गरेर भाग्नेको चपेटामा पर्न थालेका छन्। सिथिल बजारमा प्राय लगानीकर्ताको बजार विश्लेषण कमजोर छ। 
यहि कमजोरीको फाइदा उठाउदै आफुसँग धेरै शेयर हुने लगानीकर्ताले बजार बढाएको पत्तो पाउँदैनन्। खरिदकर्ता नै नभएको शेयरमा आफ्नै बढाएर माग राख्ने र बजार बढाउने प्रबृत्ती बढेको छ। 

बजारमा आफैले महँगोमा शेयर बिक्रीका लागि राख्ने र त्यो शेयर आँफैले उठाउनेसम्मका गतिविधि भएका छन्। यसोगर्दा सर्वसाधारण लगानीकर्ता कम्पनीको शेयर मूल्य बढ्न थाल्यो भनेर महंगोमा शेयर उठाउन थाल्छन्। 

हल्लै हल्लाको विचमा कम्पनी शेयर मूल्य बढ्छ। यहि अवधिमा जसरी बजार बढाउने परिकल्पना गरेका हुन्छन् उनीहरुले शेयर बिक्री गरेर बाहिरिसक्छन्। पछिल्लो दिनमा शिवम सिमेन्ट, एचआइडिसिएल, नेपाल फाइनान्स, नागरिक लगानीकोष लगायतका कम्पनी छन्। 

यसै अवधिमा दोस्रो बजारमा अर्थमन्त्रीको परिवर्तनको हल्ला चलाइएको छ, जसले गर्दा केहि अंक हल्लै हल्लाका विचमा बढिसक्छ। नागरिक लगानी कोषले पनि १० अर्ब रुपैयाँभन्दा माथिको शेयर बजारमा लगानी गर्ने कम्पनी खोल्ने समाचार बाहिर आएका छन्। 

यस्तै समाचारले लगानीकर्ताहरुलाई बजार बढ्ने मनोबल बढाउँछ। तर बजारका केही सिमित लगानीकर्ताहरुले खेल्न भ्याइसक्छन्। दोस्रो बजारमा दीर्घकालिन सुधारका लागि कम्तिमा पनि बैंकको व्याजदर घट्ने आधारहरु देखिनु पर्ने विज्ञहरु बताउँछन्। 

यससँगै बजारमा ठुला ठुला लगानीकर्ता पस्नु पर्ने उनीहरुको तर्क छ।

सोमबार करिव १८ अंकले बजार सुधार हुँदा ५९ करोड ५७ लाख रुपैयाँको खरिद बिक्री भयो। 

मंगलबार भने गएका दिनमा भएको सुधारको नाफा बुक गर्ने लगानीकर्ता हाबी हुँदा २.३७ अंकले बजार ओरालो झर्यो। तर कारोबार रकम बढेर ७२ करोड १६ लाख रुपैयाँको भयो। 

सोमबार सर्किट लागेको शिवम् सिमेन्टको बजार मंगलबार १२ रुपैयाँले घटेर ४४५ रुपैयाँमा झर्यो। कम्पनीको पहिलो त्रैमासिक वित्तीय विवरण सार्वजनिक भएपछि शेयर मूल्य घट्ने क्रममा ३५५ रुपैयाँमा झर्यो। 

पछिल्लो समय यसै कम्पनीलाई खेलाउँदै लगानीकर्ताले मूल्य बढाइरहेका छन्। मंगलबार शिवमको सबैभन्दा धेरै १० करोड ३३ लाख रुपैयाँको खरिद बिक्री भयो। पछिल्लो समय नागरिक लगानी कोषको शेयर मूल्य अधिकतम बढ्ने क्रममा छ। मूल्य बढ्दै गर्दा कारोबार रकम पनि ८ करोड ८२ लाख रुपैयाँको भएको छ। मंगलबार चार वटा कम्पनीको शेयर मूल्य अधिकतम बढ्ने क्रममा सर्किट लागेको छ।