२४ बैशाख /अर्थ र व्यापार - मंगलबार शेयर बजारमा नेप्से परिसूचक १.८७ अङ्कले बढेर १३०१.२८ अङ्कमा पुगेको छ । गत सोमबार १३१०.३१ अंकमा रहेको बजार लगातार घटेर आइतबार १२७७ अङ्कसम्म ओर्लिएको थियो । गएको दुई कारोबार दिनमा बजारमा आएको सुधारले सूचकलाई १३ सय अंकमाथि उक्लिन टेवा दिएको हो ।   

मंगलबार बजारले सुरुवाती १० मिनेट घट्दो सङ्केत दिएको थियो । तर त्यसपछि बजारमा खरिदकर्ताले शेयर खरिद आदेश बढाएसँगै सूचक माथि उक्लिन थालेको थियो । कारोबारको २२ मिनेटमा १२ अङ्कले बढेको बजारले वृद्धि भने थाम्न सकेन। बजारमा सुधार देखिए लगत्तै अल्पकालीन लगानीकर्ताले भटाभट नाफा सुरक्षित गर्न थालेपछि जसरी बढेको बजार त्यसैगरी घट्यो ।

मंगलबार १७६ कम्पनीका २५ लाख २० हजार कित्ता शेयर खरिद बिक्री भयो । बजार घटेको बेलामा पर्याप्त लगानीकर्ताले खरिद बिक्री बढाउँदा समग्र कारोबार ७२ करोड रुपैयाँ माथि उक्लिएर बन्द भएको हो । लगानीकर्ताले मंगलबार एनसिसि बैंक र शिवम् सिमेन्टको शेयर सबैभन्दा बढी खरिद बिक्री गरे । एनसिसिको पाँच करोड ९४ लाख रुपैयाँको शेयर कारोबार भयो भने सिभम्को ४ करोड ९० लाख रुपैयाँको शेयर किनबेच भयो ।

उसपसूचक मिश्रित देखिए । १० समूहको कारोबारमा आठ समूहको उपसूचक बढ्यो भने दुई समूह घटेका छन् । वाणिज्य बैंक र वित्तीय संस्थाको उपसूचक घटेको छ । पछिल्लो समय बजार बढेका बेला लगानीकर्ताले वाणिज्य बैंकको शेयर खरिद बढाएका थिए । निश्चित अवधिमा अल्पकालीन लगानीकर्ताले नाफा बुक गर्दा वाणिज्य बैंक समूहको उपसूचक घटेको हो ।