१४ माघ/ अर्थ र व्यापार - सोमबार २.७९ अंकले शेयर बजार बढे पनि कारोबार रकम २२ करोड ४३ लाख रुपैयाँमा खुम्चियो । सबै भन्दा धेरै सिभिल बैंकको संस्थापक शेयर एक करोड ९५ लाख रुपैयाँको कारोबार भएको छ । सबैभन्दा धेरै ९.९२ प्रतिशतले बढेको सपोर्ट माइक्रोफाइनान्स कारोबारमा सर्किट लागेको थियो ।

शेयर बजार १०.६८ अंकले ओरालो लागेसँगै प्यानमा देखिएको अन्यौलबारे धितोपत्र बोर्डले आवश्यक छलफलपछि मात्रै कार्यान्वयन गर्ने बताएपछि सोमबार शेयर बजारमा सामान्य सुधार देखिएको छ । अधिकांश कम्पनीले गत वर्षको नाफाबाट लाभांश बाँडिसकेकोले पछिल्लो सयम शेयर बजार घटिरहेको छ । दुई साता अगाडि माथिल्लो तामाकोशीले शेयरले बजारमा उत्साह देखिएको भएपनि पछिल्ला दिन शेयर बजार ओरालो लागिरहेको छ ।

बाणिज्य बैंक, माइक्रोफाइनान्स, बीमा कम्पनीको सूचक बढ्दा समग्र शेयर बजार नै हरियो देखिएको हो । होटल, हाइड्रोपावर, उत्पादन तथा प्रसोधन र अन्य सूचक घटेका छन् । सूचीकृत कम्पनीहरु मध्ये बीमा कम्पनीहरुले गत आर्थिक वर्षको वार्षिक साधारणसभा गर्न बाँकी छ । साथै लाभांश पनि घोषणा गरेका छैनन् । अझै लाभांश दिन बाँकी भएकोले बीमा कम्पनीको बजार मूल्य बढिरहेको छ ।

कम्पनी ऐन अनुसार आर्थिक वर्ष सकिएको ६ महिना भित्रमा साधारणसभा गरिसक्नु पर्छ । तर बीमा कम्पनीहरुले बीमाङ्कीय मूल्याङ्कन गर्न ढिलाइ गर्दा लेखापरीक्षण गर्न सकेका छैनन् । यसले गर्दा लाभांश घोषणा गर्न नसकेका हुन् ।