२४ पुस /अर्थ र व्यापार - मंगलबार शेयर बजार ०.०३ प्रतिशतले घटेको छ । सोमबार एक सातादेखि घटेको शेयर बजारमा ६.६७ प्रतिशतको सुधार देखिए पनि मंगलबार पुनः ०.४० अंकले घटेको हो । कारोबारको सुरुवातमा सोमबारको जस्तै बढ्ने अपेक्षा गरिएको भएपनि कारोबार अवधिभर सामान्य उतारचढावसँगै ११७७.०७ विन्दुमा कारोबार रोकिएको छ । 

सूचक घटेपनि कारोबार रकममा भने सामान्य सुधार देखिएको छ । सोमबार ३० करोड रुपैयाँको कारोबार भएकोमा मंगलबार ३४ करोड २७ लाख रुपैयाँको कारोबार भयो । विकास बैंक, उत्पादन तथा प्रसोधन, अन्य, र माइक्रोफाइनान्सको सूचकमा सुधार देखिए पनि अन्य सूचकहरु घटेका छन् ।

सबैभन्दा धेरै नेपाल बैंकको ८ करोड ८६ लाख रुपैयाँको कारोबार भएको छ । आरम्भ माइक्रोफाइनान्सका शेयरधनीले सबैभन्दा धेरै ९.९९ प्रतिशतले कमाएका छन् । संस्थाका शेयधरनीहरुले ६९ रुपैयाँले कमाउँदा कारोबारमा सर्किट लागेको थियो । त्यस्तै एनएमबी माइक्रोफाइनान्सका शेयरधनीहरुले ६.८५ प्रतिशतले गुमाएका छन् ।

पछिल्लो समय सरकारले बजार सुधारका लागि केही प्रयास गरेको भए पनि दोस्रो त्रैमासको बैंकको ब्याज तथा राज्यलाई तिर्नुपर्ने करको भुक्तानी साथै बैंकको व्याजदरमा सुधार हुने संकेत नदेखिँदा बजार बढ्न सकेको छैन । ब्याज भुक्तानीको दवाव शेयर बजारमा अझै २५र२६ गतेसम्म पर्नेछ ।