२८ चैत्र /अर्थ र व्यापार - साताको अन्तिम कारोबार दिन बिहीबार शेयर बजारमा गिरावट देखिएको छ । नेपाल स्टक एक्सचेन्जको कारोबार मापक सूचक ०.५९ अङ्कले घटेर ११८४.०२ अंकमा ओर्लिएको छ । पाँच कारोबार दिनमा शेयर बजार तीन दिन बढ्यो भने दुई दिन घटेको छ । ११६५.२० अंकबाट सुरु भएको साप्ताहिक कारोबार अन्तिम दिन ११८४.०२ अंकमा पुगेर बन्द भएको छ । साताभरिमा सूचक १९ अङ्कले बढेर बन्द भएको हो ।
बिहीबार १७० कम्पनीको १२ लाख कित्ता शेयर कारोबार भएको छ । ३९ करोड रुपैयाँको शेयर कारोबार हुँदा सबैभन्दा बढी कुमारी बैंकको शेयर खरिद बिक्री भएको छ । कुमारी बैकको मात्रै करिब चार करोड रुपैयाँको शेयर कारोबार भएको छ। बैंकले वैशाख २६ गते साधारणसभा डाकेलगत्तै लगानीकर्ताले शेयर खरिद बिक्री चाप बढाएका छन् । साधारणसभामा बैकले दुई आर्थिक वर्षको लाभांश पारित गर्दै छ । बैंकले २१.१५ प्रतिशत बोनस शेयर वितरण गर्दैछ ।
बिहीबारको कारोबारमा सबैभन्दा बढी एभरेस्ट इन्स्योरेन्स कम्पनीको मूल्य बढेको छ । प्रति कित्ता करिब १० प्रतिशत मूल्य बढ्यो । धितोपत्र बोर्डले तीन सय प्रतिशत हकप्रद निष्कासन स्वीकृति दिए लगत्तै बजार मूल्य बढेको हो ।
तपाईको प्रतिक्रिया