१० पुष / अर्थ र व्यापार - दोस्रो बजारमा ऋणपत्रको खरिद बिक्री बढ्न थालेको छ। बुधबार सानिमा बैंकको ऋणपत्रको कारोबार भएको थियो। बिहीबार पनि एनआईसी एशिया बैंकको ऋणपत्रको कारोबार भएको छ।

एनआईसी एशियाको आज भएको कारोबारमा २० रुपैयाँले बढेर प्रति इकाई १०२० रुपैयाँमा खरिद बिक्री भएको छ। बैंकको ६ वटा कारोबार भएको छ। एक हजार एक रुपैयाँदेखि १०४० रुपैयाँको दरमा खरिद बिक्री भएको हो। नेपाल स्टक एक्सचेन्जले अनलाइन प्रणालीबाटै कारोबार गर्ने प्रणाली विकास गरेसँगै अन्य शेयरको जस्तै ऋणपत्रको पनि कारोबार हुन थालेको हो।

पछिल्लो समय बाणिज्य बैंकले दीर्घकालिन पूँजी जुटाउने साधनको रुपमा ऋणपत्र निष्काशन गर्दै आएका थिए। त्यस्तै चालु आर्थिक वर्षको मौद्रिक नीति मार्फत बाणिज्य बैंकहरुले पुँजीको २५ प्रतिशत ऋणपत्र अनिवार्य निष्काशन गर्नु पर्ने व्यवस्था गरेको थियो।

यो नीतिपछि पछिल्लो समय बाणिज्य बैंकहरुले ऋणपत्र निष्काशन गरिरहेका छन्। ऋणपत्र निष्काशन गरिए पनि समयमा बिक्न सकेको थिएन। ऋणपत्र खरिद गरेपछि सजिलै दोस्रो बजारमा खरिद बिक्री गर्न नसकिने भन्दै लगानीकर्ताको आकर्षण देखिएको थिएन।

अनलाइन प्रणालीबाट सहजै खरिद बिक्री गर्न सकिने भए पछि बैंकहरुले निष्काशन गरेको ऋणपत्र बिक्न सक्ने बैंकरहरु बताउँछन्। विहिबार बिक्री भएको एनआईसी एशियाको ऋणपत्रको व्याजदर ११ प्रतिशत छ। यसले गर्दा पनि बैंकको ऋणपत्र बढेर खरिद बिक्री भएको हो।