२१ असोज/अर्थ र व्यापार– बुधवार १४ दशमलव ६८ अंकले बढेर शेयर बजार १६००.९७ विन्दुमा पुगेर बन्द भएको छ । नेप्सेले यस अघि गत फागुन १५ गते १६०० विन्दु पार गरेको थियो ।

बुधवार १९५ ओटा कम्पनीको रू. ३ अर्ब ३५ करोड ८५ लाख ६ हजार बराबरको शेयर कारोबार भएको छ । परिसूचकमा दोहोरो अंकको वृद्धिसँगै कारोबार रकम पनि ३ अर्ब नाघेको हो । बुधवार अरुण कावेली पावरको सर्वाधिक रू. १५ करोड २९ लाख २३ हजार बराबरको शेयर कारोबार भएको छ । 

जलविद्युत् समुहको परिसूचक सर्वाधिक ५.५४ प्रतिशत बढेको छ । त्यस्तै विकास बैंकको ३.९ प्रतिशत, होटल समुहको २.९८ प्रतिशत, वित्तको २.९४ प्रतिशत, व्यापारिकको ०.६५ प्रतिशत, निर्जीवन बीमाको ०.९६ प्रतिशत, म्यचुअल फण्डको ०.४९ प्रतिशत, बैंकिङको ०.४४ प्रतिशत र जीवन बीमाको ०.१८ प्रतिशत परिसूचक बढेको छ ।
बुधवार सर्वाधिक कारोबारसँगै सर्वाधिक मूल्य वृद्धि हुने कम्पनीमा जलविद्युत् कम्पनीहरु रहेका छन् ।

आज सर्वाधिक रकमको कारोबार गर्ने १० ओटा कम्पनीहरुमध्ये नौ ओटा जलविद्युत् कम्पनी रहेका छन् ।
अरुण कावेली पावर, अरुणभ्याली हाइड्रोपावर, सानिमामाई हाइड्रोपावर, हिमाल दोलखा हाइड्रो, हाइड्रो इलेक्ट्रिसिटी एण्ड डेभलपमेण्ट कम्पनी, अपर तामाकोशी, अपि पावर, बुटवल पावर, युनाइटेड मोदी र शिवम् सिमेन्ट सर्वाधिक रकमको कारोबार गर्ने १० ओटा कम्पनीभित्र परेका हुन् । 

बुधवार कारोबारमा आएका १२ ओटा समुहमध्ये उत्पादन तथा प्रशोधन समुहको शून्य दशमलव शून्य ३ प्रतिशत र लघुवित्तको शून्य दशमलव शून्य १ प्रतिशत घटेको छ भने बाँकी समुहको बढेको छ ।