२ कात्तिक/अर्थर व्यापार– साताको पहिलो दिन आइतबार सेयर बजार परिसूचक नेप्सेमा ५.६६ अंकको गिरावट आएको छ । आज नेप्से १ हजार ५५६ अंकमा कायम भएको छ । 

आइतवार १८७ ओटा कम्पनीको रू. १ अर्ब २५ करोड २७ लाख ४८ हजार बराबरको शेयर कारोबार भएको छ । उक्त रकम बराबरको ४३ लाख ५२ हजार १० कित्ता शेयर १६ हजार ८४६ पटकको व्यापारमा कारोबार भएको हो । 

कुल कारोबारमा सर्वाधिक हिस्सा हिमालयन बैंक लिमिटेडको संस्थापक शेयरको रहेको छ । बैंकको संस्थापकतर्फको सबैभन्दा उच्च २४ करोड रुपैयाँ बराबरको कारोबार भएको छ । यस्तै, नेपाल पुनर्बीमा कम्पनीको ४ करोड ७६ लाख रुपैयाँको कारोबार भएको छ । 

आईतबार ब्यापार र निर्जीवन बीमा समूहबाहेकका सबै समूह ओरालो लागेको छ । ब्यापार समुह १३, र निर्जीवन बीमा ३१ अंकले बढेका छन् । 

जनरल इन्स्योरेन्सको शेयरमूल्य सर्वाधिक ९ दशमलव ७८ प्रतिशतले बढेको छ । उक्त कम्पनीको शेयरमूल्य आइतवार प्रतिकित्ता रू ३६ ले बढेर अन्तिम मूल्य रू. ४०४ पुगेको छ । जनरल इन्स्योरेन्सका लगानीकर्ताले करिब १० प्रतिशत मूल्य कमाएका छन् । त्यस्तै आइसिएफसी फाइनान्सको मूल्य ५. २६ प्रतिशतले बढेको छ । 

बैंकिङ ६, होटल १, विकास बैंक २९, जलविद्युत ५, फाइनान्स १, उत्पादन १४, अन्य १, माइक्रोफाइनान्स ११, जीवन बीमा १८ अंकले घटेका छन् । 

रैराङ हाइड्रोको मूल्य सबैभन्दा धेरै ७. ५ प्रतिशतले घटेको छ भने नेपाल फाइनान्सको मूल्य ६. २ प्रतिशतले घटेको छ ।