२ पुस /अर्थ र व्यापार  - शेयर लगानीकर्ताको आमरण अनशसनमा प्रमुख प्रतिपक्षी नेपाली कांग्रेसले ऐक्यबद्धता जनाएको छ । आमरण अनशनस्थल नेप्से परिसर पुगेर कांग्रेस प्रवक्ता विश्वप्रकाश शर्मा र पूर्व अर्थमन्त्री ज्ञानेन्द्रबहादुर कार्की लगायतले शेयर लगानीकर्ताको मागमा संस्थागत समर्थन जनाएका हुन् ।

पूर्व अर्थमन्त्री एवं कांग्रेस केन्द्रीय सदस्य ज्ञानेन्द्र बहादुर कार्कीले कम्युनिष्ट सरकार शेयर बजारप्रति सकारात्मक नदेखिएको आरोप लागाए । एमाले माओवादीको एकता घोषणा देखि नै शेयर बजारमा समस्या देखिएको भन्दै कार्कीले लगानीकर्ताको आन्दोलनमा कांग्रेसको साथ रहने स्पष्ट पारे ।

कांग्रेस प्रवक्ता शर्माले शेयर लगानीकर्ताको माग जायज भएको भन्दै सरकारलाई गम्भिर बन्न आग्रह गरे । आफ्नै सम्पतीको रक्षा गर्न आमरण अनशन बस्नुपर्ने दिन आउँदा पनि सरकारी तवरबाट खास कदम नचालिनु दुखःद भएको प्रवक्ता शर्माको भनाई थियो ।