६ असोज/अर्थ र व्यापार– मंगलवार सेयर बजार २२ दशमलव ९१ अंक घटेर १५ सय ४६ दशलमव १५ अंकमा ओर्लिएको छ । 

कारोबार सुरु हुँदा १५७६.५५ विन्दु रहेको सेयर बजार मंगलबार अन्तिम समयसम्मै निरन्तर घटेर बन्द भयो । 
मंगलबार सेयर बजार परिसूचक घटेको भए पनि कारोबार रकम भने सोमबारको तुलनामा झन्डै १७ करोडले बढेको छ ।

सोमबार २ अर्ब ६३ करोड ७३ लाख बराबरको सेयर कारोबार भएको थियो भने मंगलबार यो २ अर्ब ८१ करोडभन्दा बढीको भएको छ । यो रकम १९९ कम्पनीको ७८ लाख ५० हजार ६५ कित्ता सेयर किनबेचको हो ।

मंगलबार शिखर इन्स्योरेन्सको सेयर कारोबार सबैभन्दा धेरै रकम (करिब रु. ३१ करोड ८८ लाख) को भएको छ । शिखरले अघिल्लो आवको नाफाबाट सेयरधनीहरुलाई लाभांश नदिने निर्णय गरेको सूचना दिएसँगै यसको सेयर मूल्य एकैदिनमा ४५ रुपैयाँले घटेको हो ।

शिखरपछि दोस्रोमा धेरै रकमको कारोबार नेपाल बैंकको सेयरको भएको छ । नेपाल बैंकको १९ करोड ५ लाख रुपैयाँ बराबरको सेयर कारोबार भएको छ । 

युनाइटेड फाइनान्सलाई वाणिज्य बैंकले प्राप्ति गर्ने हल्ला बजारमा आएसँगै सोमबार पनि १० प्रतिशतको सकारात्मक सर्किट लागेको छ । बजार बन्द हुने बेलासम्म यस फाइनान्सको सेयर मूल्य ८.१८ प्रतिशत बढेर प्रतिकित्ता २३८ पुगेको छ ।

मंगलबार कारोबार भएका कम्पनीमध्ये १२ वटाको सेयर मूल्य बढ्यो भने १५५ कम्पनीको घटेको छ । पाँच कम्पनीको सेयर मूल्य स्थिर रहेको छ ।

दोस्रो बजार (नेप्से) मा साधारण सेयर सूचीकृत भएको दिनदेखि नै ओरालो लागेको लिवर्टी इनर्जीको सेयर मूल्यमा मंगलबार पनि नकारात्मक सर्किट लाग्यो ।