२० पुस /अर्थ र व्यापार - ३ दिनअघि नेपाल स्टक एक्सचेञ्जले सेयर किनबेच गर्दा अनलाइनबाटै भुक्तानी गर्न सकिने ब्यवस्था गरेको छ । यो प्रणाली शुरु भएसँगै लगानीकर्ताहरुले अनलाइनबाटै भुक्तानी गर्छन् भन्ने धेरैको विश्वास थियो । तर, लगानीकर्ताहरुले पूरानै प्रणालीबाट भुक्तानी गरेका छन् ।

अनलाइन भुक्तानी प्रणाली शुरु भएको दिन १०० प्रतिशत भुक्तानी चेकबाटै भएको छ र लगानीकर्ताहरु नयाँ सिस्टमप्रति आकर्षित भएको नदेखिएको नेपाल स्टक एक्सचेञ्जका प्रवक्ता मुरारी पराजुलीले बताए । अनलाइन भुक्तानी ऐछिक भएको यसअघि अभ्यान नभएकाले पनि लगानीकर्ताहरुलाई आकर्षित नगरेको हुनसक्ने उनको विश्लेषण थियो । भिजन सेक्युरिटीज र कालिका सेक्युरिटजमार्फत् सेयर कारोबार गर्दै आएका २ जना लगानीकर्ताले पेश्की भुक्तानी गरेका हुन् ।

लगानीकर्ताका संघ संगठनहरुले वर्षौंदेखि अनलाइन भुक्तानीको माग जोडदाकार साथ उठाउँदै आएका थिए । तर, व्यवस्था भएपछि भने कारोबार गर्नतर्फ लगानीकर्ताहरु उत्सुक देखिएनन् । विस्तारै अनलाइन भुक्तानीमा आकर्षण बढ्ने  विश्वास रहेको पराजुलीले बताए । नेपाली सेयर बजारमा १५ लाख लगानीकर्ता भएको दाबी छ ।