१७ पुस/ अर्थ र व्यापार - चन्द्रागिरि केवलकार सञ्चालन गरिरहेको चन्द्रागिरि हिल्स लिमिटेडले सर्वसाधारणका लागि १५ करोड रुपैयाँ बराबरको १५ लाख कित्ता आईपिओ निष्काशन गर्ने भएको छ । कम्पनीले उक्त प्रस्ताव आगामी साधारण सभामा लग्ने भएको छ ।

कम्पनीले आईपिओ निष्काशनको प्रस्ताव राखेर यहि पुस ३० गते नवौं बार्षिक साधारण सभा आह्वान गरेको छ । साधारण सभाको विशेष प्रस्तावमा कम्पनीको प्रवन्धपत्र तथा नियमावलि संसोधन पश्चात जारी पूँजी एक अर्ब ५० करोड रुपैयाँ कायम गर्ने उल्लेख छ ।
कम्पनीले जारी पूँजीको १० प्रतिशत हुन आउने १५ करोड रुपैयाँ बराबरको १५ लाख कित्ता आईपिओ निष्काशन गर्ने प्रस्ताव पारित गर्ने जनाएको छ । साथै कम्पनीले साधारणसभा बाट संस्थापक शेयरधनीको तर्फबाट प्रतिनिधित्व गर्ने संचालकको निर्वाचन गर्नेछ ।

केबलकार आईएमई ग्रुप लगायत अन्य व्यवसायिक घरनाले सञ्चालनमा ल्याएको हो । चन्द्रागिरि केवलकार २०७३ देखि सञ्चालनमा आएको हो । काठमाडौं र मकवानपुर जिल्ला छुने चन्द्रागिरीको डाँडोमा कम्पनीले केवलकारको अतिरिक्त रिसोर्ट समेत सञ्चालनमा ल्याउदै छ ।