आन्दोलनको प्रभाव सेयर बजारमा, नेप्से १६०.३३ अंकले घटेर २५११ विन्दुमा

40 पटक पढिएको

२ असोज/अर्थ र व्यापार – यस साताको अन्तिम कारोबार दिन बिहीबार सेयर बजार भारी अंकले घटेर पहिरो नै गएको छ । जेनजी पुस्ताले केही दिनअघि गरेको आन्दोलनको प्रभावका कारण गत २३ भदौपछि पहिलोपटक बिहीबार खुलेको सेयर बजार लगातार तेस्रो नेगेटिभ सर्किट लागेर बन्द भयो । यसदिन सेयरबजार परिसूचक नेप्से १ सय ६० दशमलब ३३ अंकले घटेर २५ सय ११ दशमलब ९१ विन्दुमा झरेको छ ।
यस साताको अन्तिम कारोबार दिन बिहीबार कारोबार खुलेको २ मिनेटमै नेगेटिभ सर्किट लागेर बजार २० मिनेटका लागि बन्द भएको थियो ।
त्यसपछि ११ बजेर २ मिनेटमा १ सय ७ दशमलब ०४ अंकले घटेर नेप्से २५ सय ६५ दशमलब २१ अंकमा झरेको थियो । त्यसपछि ११ बजेर २२ मिनेटमा खुलेको बजारमा पनि घट्ने क्रम रोकिएन । सो समय पनि नेप्सेमा एक मिनेटमै दोस्रो नेगेटिभ सर्किट लाग्यो ।
दोस्रो नेगेटिभ सर्किट लागेपछि ४० मिनेटका लागि बन्द भएको नेप्से पुनः १२ बजेर ०३ मिनेटमा खुलेको थियो । तर तेस्रो मिनेटमै तेस्रो नेगेटिभ सर्किट लागेपछि बजार दिनभरका लागि बन्द भएको हो ।
यसदिन बजारमा ६ मिनेटमा ७२ करोड ८७ लाख रुपैयाँको सेयर कारोबार भएको छ । २ सय १७ वटा कम्पनीको सेयर मूल्य घटेको छ । नेपाल रिइन्स्योरेन्स, हिमालयन रिइन्स्योरेन्स, नेपाल माइक्रो इन्स्योरेन्स लगायत डेढ दर्जन कम्पनीमा नेगेटिभ सर्किट लागेको छ । यसदिन ९ वटा कम्पनीको सेयरमूल्य सुचक मात्र हरियो थियो ।

तपाईको प्रतिक्रिया

सम्बन्धित शीर्षकहरु