३० असार/अर्थ र व्यापार – यस साताको दोस्रो कारोबार दिन सोमबार भारी अंकले घटेको सेयर बजारलाई हेर्दा सेयर बजारअनुकूल मौद्रिक नीति आएपनि लगानीकर्ताबीच किन टिकेन उत्साह ? भन्ने कौतुहलता उत्पन्न भएको छ ।
नेपाल राष्ट्र बैंकले सार्वजनिक गरेको आगामी आर्थिक वर्षको मौद्रिक नीति सेयर बजार अनुकूल आएपछि अघिल्लो कारोबार दिन आइतबार सेयर बजारमा निकै उत्साह देखिएर सेयर बजार परिसूचक नेप्से २९ अंक बढेको थियो । तर, सो वृद्धि दुई दिन पनि टिक्न सकेन । सोमबार बजार खुल्नेबित्तिकै देखि ओरालो लागेको नेप्से बजार बन्द हुँदा ३५ दशमलब ०९ अंकले घटेर २७ सय २५.७१ विन्दुमा ओर्लिएको छ ।
यसदिन अघिल्लो दिनको तुलनामा कारोबार रकम पनि घटेको छ । अघिल्लो दिन ११ अर्ब ४१ करोड रुपैयाँ बढीको कारोबार भएकोमा यसदिन जम्मा ८ अर्ब १७ करोड रुपैयाँको मात्र सेयर कारोबार भएको छ । ५० कम्पनीको सेयरमूल्य बढेको छ भने १ सय ९८ वटा कम्पनीको सेयरमूल्य घटेको छ ।
यसदिन हाइड्रोपावर बाहेक सबै उपसमूहको सेयरमूल्य सूचक घटेका छन् । हाइड्रोपावर उपसमूहको शून्य दशमलब १५ प्रतिशतले बढेको छ । अरु सबै उपसमूहको सूचक रातामै भएर घटेका छन् ।
बैंकिङ उपसमूहको सबैभन्दा धेरै २ दशमलब ४६ प्रतिशतले घटेको छ । विकास बैंक उपसमूहको १.४८ प्रतिशत, फाइनान्स उपसमूहको १.१३, होटल तथा पर्यटन ०.२५, लगानी १.२५, जीवन बीमा १.३६, उत्पादन तथा प्रशोधन ०.७८, माइक्रोफाइनान्स १.२३, निर्जीवन बीमा १.०५, अन्य १.२५ तथा व्यापार उपसमूहको ०.६४ प्रतिशतले घटेको छ ।
यसैगरी, सामुदायिक लघुवित्तको ४.४६, धौलागिरि लघुवित्तको ४.३४, लक्ष्मी सनराइज बैंकको ३.८६, नेपाल इन्भेस्टमेन्ट मेगा बैंकको ३.८० तथा सिटिजन्स बैंकको ३.७४ प्रतिशतले घटेको छ ।

यसदिन माइखोला हाइड्रोपावरको सेयरमूल्य सबैभन्दा धेरै ५ दशमलब ९० प्रतिशतले बढेको छ । हिमालयन हाइड्रोपावरको ४.४८, जोशी हाइड्रोपावरको ४.४३ तथा सिनर्जी पावरको ४.१२ प्रतिशतले बढेको छ ।
सोमबार धेरै कारोबार भएका पाँच कम्पनीमा एनआरएन इन्फ्रास्ट्रक्चर, बुटवल पावर, सानिमा बैंक, एनआईसी एसिया बैंक र साहस ऊर्जा रहेका छन् । मौद्रिक नीतिपछि ह्वात्तै बजार बढ्ने लगानीकर्ताको अपेक्षा विपरित यस दिनको घटाइलाईलाई निकै गम्भिर रुपमा हेरिएको छ ।