२ भदौ/अर्थ र व्यापार –  तीव्र उतारचढावबीच आइतबार सेयर बजार परिसूचक नेप्से ३४.४७ अंकले करेक्सन भएर २९ सय ६६ विन्दुमा ओर्लिएको छ । अघिल्लो कारोबारको ३ हजार विन्दुबाट नेप्से केही ओरालो लागेको हो ।
साताको पहिलो दिन आइतबार बजारको परिसूचक नेप्से अघिल्लो कारोबार दिनको तुलनामा ३४.४७ अंकले करेक्सन भएर ३ हजार अंकमा रहेको बजार २९ सय ६६ विन्दुमा आइपुगेको हो ।

दिनभर तीव्र उतारचढाव देखिएको बजार बिहान ११: ५८ बजे ३ हजार ४८ अंकसम्म पुगेको थियो । सो बजार दिउँसो २: ४२ बजे २९ सय ४७ अंकसम्म झरेको थियो । यसरी बजार घट्दा पनि कारोबार रकम भने खासै घटेको छैन ।
आइतबार दिनभर कुल २८ अर्ब ८३ करोडको कारोबार भएको थियो । अघिल्लो दिन हालसम्मकै उच्च २९ अर्ब ९५ करोडको भएको थियो । ४७ कम्पनीको मूल्य बढ्दा १९७ को घट्यो । बैंकिङ ०.८४ तथा निर्जीवन बीमा ०.४६ प्रतिशत बढे । विकास बैंक २.२५, फाइनान्स २.७९, होटल तथा पर्यटन ४.४९, हाइड्रोपावर ३.७४, उत्पादन २.५८, माइक्रोफाइनान्स ०.३१, अन्य ३ र व्यापार समूह १.३२ प्रतिशत घटे ।
यसदिन बजार घट्दा पनि राष्ट्रिय बीमा कम्पनी, लाइफ इन्स्योरेन्स कर्पोरेसन, मल्टिपर्पस फाइनान्स, सम्पदा लघुवित्त र लिबर्टी इनर्जीको मूल्य १० प्रतिशत बढ्यो । त्यस्तै रिलायन्स फाइनान्सको ६.९, उन्नति सहकार्यको ६.६, कर्णाली विकास बैंकको ५.२, नागरिक लगानी कोषको ४.७, बुटवल पावरको ४.६ प्रतिशत मूल्य बढ्यो ।
नेपाल फाइनान्सको मूल्य १० प्रतिशत घट्यो । सगरमाथा जलविद्युत् कम्पनीको ८.५, न्यादी हाइड्रोको ८.४, शुभम पावरको ७.७, मातृभूमि लघुवित्तको ७.५ प्रतिशत मूल्य घट्यो । कारोबार रकमका आधारमा हिमालयन रिइन्स्योरेन्स, अपी पावर, कुमारी बैंक, एचआईडीसीएल र ङादी ग्रुप पावर क्रमशः अगाडि रहे ।