३१ साउन/अर्थ र व्यापार – अहिले नेपाली सेयर बजारमा कारोबार रकमले नयाँ रेकर्ड बनाएको छ । साताको अन्तिम कारोबार दिन बिहीबार झण्डै ३० अर्ब रुपैयाँ बराबरको सेयर कारोबार भएको छ ।
नेपाल स्टक एक्सचेञ्ज (नेप्से)का अनुसार बिहीबार कुल २९ अर्ब ९५ करोड ८५ लाख रुपैयाँ बराबरको सेयर कारोबार भएको छ । यो हालसम्मकै उच्च कारोबार हो । यसअघि गत सोमबार २७ अर्ब २४ करोड रुपैयाँ बराबरको सेयर कारोबार भएको थियो ।
बिहीबार नेप्से ३० महिनायताकै उच्च बिन्दुमा पुगेको छ । बिहीबार नेप्से परिसूचक ४३.०५ अंकले बढेर ३ हजार.८१ को विन्दुमा आइपुगेको छ । बिहीबार १०६ वटा कम्पनीको सेयर मूल्य बढ्दा १३६ कम्पनीको सेयर मूल्य घटेको थियो भने एउटा कम्पनीको स्थिर रह्यो ।
यसदिन लगानीकर्ता बैंकिङ समूहमा झुम्मिँदा सो समूह ५.६५ प्रतिशत बढेको नेप्सेले जनाएको छ । सूचीकृत समूहमध्ये फाइनान्स ३.०५, जीवन बीमा ०.३७, उत्पादन तथा प्रशोधन समूह १.७३, लघुवित्त ०.१३ र अन्य समूह २.३० प्रतिशतका दरले घटेको छ भने त्यसबाहेक सबै समूहमा हरियाली छाएको छ । सबैभन्दा धेरै बैंकिङ समूहका लगानीकर्ताले कमाउँदा फाइनान्स समूहका लगानीकर्ताले ३.०५ प्रतिशतका दरले गुमाएका छन् ।
कारोबार रकमको आधारका हिमालयन रि, सानिमा माइ हाइड्रोपावर, अपि पावर, कुमारी बैंक र निफ्रा क्रमश अगाडी रहेका छन् । बिहिबार बुटवल पावर, राष्ट्रय बिमा कम्पनी र मोदी इनर्जीको मूल्य १० प्रतिशतले बढेको छ । त्यस्तै नेपाल फाइनान्सको मूल्य १० प्रतिशतले घटेको छ ।
यो साताको अन्तिम कारोबार दिन बिहीबार सेयर बजारमा झन्डै ३० अर्ब रुपैयाँ बराबरको कारोबार भएपछि लगानीकर्ताबीच निकै उत्साह छाएको छ । यो कारोबार रकम हालसम्मकै उच्च हो । यसदिन नेप्से परिसूचक पनि तीन वर्ष अघि (१५ भदौ २०७८) कै उच्च विन्दुमा पुगेको छ । त्यतिबेला २ भदौमा नेप्से ३१ सय ९८ अंकको उच्चतम रेकर्ड बनाएर बजार क्रमशः घट्दो अवस्थामा थियो ।
अहिले बजार फर्किएर पुनः तीनवर्ष पहिलेको अवस्थामा आइपुगेको हो । अझै सेयर बजार बढेर सजिलै ३२ सय भन्दामाथी पुग्ने अहिलेको माहोलबाट अनुमान गर्न सकिने सम्बन्धीत लगानीकर्ताहरुले बताएका छन । सेयर बजारका विज्ञहरुले भने यसरी बजार उचालिएको बेला लगानीकर्ताहरु एकदमै सचेत भएर अघिबढ्नुपर्ने सुझाएका छन ।
तपाईको प्रतिक्रिया