२९ साउन/अर्थ र व्यापार – लगातार उकालो लागेको सेयर बजारमा मंगलबार भने सामान्य करेक्सन भएर नेप्से परिसूचक ८.१८ अंकले घटेर २९२३.४६ विन्दुमा झरेको छ। यसअघि सोमबार सेयर कारोबार रकममा कीर्तिमानी रेकर्ड बनाएको बजार मंगलबार सामान्य अंकले घटेको हो।
सोमबार २७ अर्ब २४ करोड २० लाख रुपैयाँको सेयर किनबेच भएर सेयर बजारले नयाँ रेकर्ड कायम गरेको थियो । मंगलबार कारोबारमा आएका फाइनान्स, बैंकिङ, लाइफ इन्स्योरेन्स, इन्भेष्टमेन्ट र ट्रेडिङ बाहेकका उपसमूहले बजार केही घटाएका हुन।
मंगलबार कुल २१ अर्ब ५१ करोड ५० लाख रुपैयाँको सेयर किनबेच भएको छ। नेपाल फाइनान्सको सर्वाधिक ८१ करोड ९९ लाख रुपैयाँको सेयर कारोबार भएको छ।
त्यस्तै, हिमालयन रिइन्स्योरेन्स ६८ करोड २१ लाख र शिवम् सिमेन्टको ४४ करोड ४२ लाख रुपैयाँको सेयर कारोबार भएको छ।
कारोबारमा आएका ३३२ मध्ये १५७ कम्पनीको सेयर मूल्य घटेको छ। नेपाल फाइनान्सको सर्वाधिक ९.९३ प्रतिशतले सेयर मूल्य घटेको छ । यसदिन ८० कम्पनीका लगानीकर्ताले कमाएका छन्। ८ वटा कम्पनीको सेयर मूल्यमा सकारात्मक सर्किट लागेको छ।
यस दिन बैंकिङ ०.४५, फाइनान्स १.५७, जीवन बीमा ०.५४ तथा व्यापार समूह ०.०६ प्रतिशत बढे । विकास बैंक १.३६, होटल तथा पर्यटन २.२५, उत्पादन १.४०, माइक्रोफाइनान्स १.१३, निर्जीवन बीमा १.०२ र अन्य समूह सूचक ०.७४ प्रतिशत घटे ।
मातृभूमि लघुवित्त, पिपुल्स पावर, दोल्ती पावर, गुडविल फाइनान्स, न्यादी हाइड्रोपावर र मिडसोलु हाइड्रोपावरको मूल्य १० प्रतिशत बढ्यो । विन्ध्यबासिनी हाइड्रोपावरको ९.७, शुभम् पावरको ९.६ तथा प्रोग्रेसिभ फाइनान्सको मूल्य ७.७ प्रतिशत बढ्यो ।
नेपाल फाइनान्सको मूल्य ९.९ प्रतिशत घट्यो । सगरमाथा जलविद्युतको ७.१, आत्मनिर्भर लघुवित्तको ६.९, मैलुङखोला जलविद्युतको ६ तथा अभियान लघुवित्तको मूल्य ४.५ प्रतिशत घट्यो ।