१० साउन/अर्थ र व्यापार – अघिल्लो सातादेखि लगातार बढेर बुधबार करेक्सन भएको सेयर बजार बिहीबार भने दोहोरो अंकले बढेर बन्द भयो । साताको अन्तिम कारोबार दिन नेप्से ३२ अंकले बढेर २५ सय ६८ दशमलब ११ विन्दुमा उक्लिएको छ ।
सेयर बजार बढेपनि कारोबार रकम भने घटेको छ । बुधबार १६ अर्ब रुपैयाँभन्दा बढीको सेयर किनबेच भएको थियो । बिहीबार १४ अर्ब १३ करोड रुपैयाँको कारोबार भएको छ।
बिहीबार १ सय ४३ कम्पनीको सेयर मूल्य बढ्दा ९६ को घटेको छ । यसदिन ३ वटा कम्पनीको भने सेयर मूल्य स्थिर रह्यो। ४ कम्पनीको सेयर मूल्यमा भने सकारात्मक सर्किट लागेको छ।
उपकार लघुवित्त, जीवन विकास लघुवित्त, एसियन हाइड्रोपावर र गणपति लघुवित्तको सेयर मूल्यमा सकारात्मक सर्किट लागेको छ । मितेरी विकास बैंक, माण्डू हाइड्रोपावर लगायतका कम्पनीका लगानीकर्ताले भने गुमाएका छन्।
कारोबारका हिसाबले सानिमा जीआइसी इन्स्योरेन्स सबैभन्दा अघि रह्यो। बिहीबार विकास बैंक, जलविद्युत, लगानी कम्पनीका सेयरधनीले गुमाउँदा अरुले भने कमाएका छन्।