७ साउन/अर्थ र व्यापार – सोमबार दिनभर सेयर बजारमा तीव्र उतारचढाव देखियो । यस दिन तीन पटकसम्म बजारले २५०० अंक नाघे पनि बजार बन्द हुँदा भने २४ सय ८८ अंकमा रह्यो ।
कारोबार सुरु भएको ५ मिनेटमै नेप्से परिसूचक २५ सय ४ अंकमा पुगेको थियो । तर, टिक्न सकेन । बिहान ११: १४ मा २४ सय ६४ अंकमा झरेको बजार ११: २४ बजे नै २५ सय १ मा पुग्यो, तर दोस्रो पटक पनि टिक्न सकेन । त्यसपछि सवा १२ बजेतिर २४ सय ४२ अंकमा झ¥यो । दिउँसो २: २७ बजे २५ सय १ अंकमा पुगे पनि टिक्न सकेन ।
अन्ततः दिउँसो ३ बजे बजार २४ सय ८८ अंकमा आएर बन्द भयो, जुन अघिल्लो दिनको तुलनामा नेप्से २.१५ अंक बढी हो । तीव्र उतारचढावका बीच बढेरै बजार बन्द भयो ।
कारोबार रकम केही घटेको छ । अघिल्लो दिन १५ अर्ब नाघेको कारोबार सोमबार १३ अर्ब ९१ करोडमा खुम्चियो । यसदिन १ सय १५ कम्पनीको मूल्य बढ्दा १ सय २१ वटाको घटेको थियो भने ६ वटाको स्थिर रह्यो ।
सोमबार बैंकिङ १७, विकास बैंक ३१, होटल तथा पर्यटन १४, माइक्रोफाइनान्स २८ र निर्जीवन बीमा समूह ८ अंकले घटे । फाइनान्स २०, हाइड्रोपावर ५२, उत्पादन १६०, अन्य २६, व्यापार ६७ अंक बढे ।
प्रतिशतका आधारमा उत्पादन समूह सबैभन्दा धेरै २.१६ प्रतिशत बढ्यो भने बैंकिङ १.२३ प्रतिशत घट्यो । मुक्तिनाथ कृषि कम्पनीको १० प्रतिशत मूल्य बढ्यो । नेपाल फाइनान्सको ८.६ प्रतिशत, छ्याङदी हाइड्रोपावरको ७.९ तथा बलेफी हाइड्रोको ६.८ प्रतिशत बढ्यो । गणपति लघुवित्तको ९.९, सिक्लेस हाइड्रोपावरको ८.६, जनउत्थान सामुदायिक लघुवित्तको ३.९ प्रतिशत मूल्य घट्यो ।
हिमालयन रिइन्स्योरेन्स, शिवम् सिमेन्ट, कुमारी बैंक, सीईडीबी हाइड्रोपावर र हिमालयन डिस्टिलरी कारोबार रकमका आधारमा क्रमशः अगाडि देखिएका थिए ।