३१ असार/अर्थ र व्यापार – आइतबार उच्च अंकले बढेको सेयर बजार साताको दोस्रो दिन सोमबार ओरालो लागेको छ । सोमबार नेप्से परिसूचक १७.१८ अंकले घटेर २२ सय ४०.४१ को विन्दुमा पुगेको छ ।
यसदिन कारोबार रकम भने बढेर झन्डै ९ अर्ब रुपैयाँ पुगेको छ । कारोबारमा आएका हाइड्रोपावर,इन्भेष्टमेन्ट, उत्पादन तथा प्रशोधन र म्युचुअल फन्ड बाहेकका ९ उपसमूहले बजार घटाएका हुन् । ३ सय २२ वटा कम्पनी मध्ये १८४ कम्पनीको सेयर मूल्य घटेको छ । सेलिङ प्रेसरका कारण नेप्से परिसूचक घटेको हो ।
आइतबार ५२.९७ अंकले बजार बढ्दा अधिकांश कम्पनीको सेयर मूल्य बढेको थियो। पछिल्लो दुई साता लगातार बढेको मूल्यमा लगानीकर्ताहरु नाफा बुक गर्न लाग्दा सोमबार परिसूचक घट्न पुगेको हो ।
सोमबार ८ अर्ब ७३ करोड रुपैयाँको सेयर किनबेच भएको छ । अघिल्लो दिन आइतबार नेप्से ५२.९७ अंकले बढेर २२ सय ५७.५९ को विन्दुमा रहँदा जम्मा ७ अर्ब ६२ करोड रुपैयाँको सेयर किनबेच भएको थियो। सोमबार कारोबार रकम झन धेरै बढेको हो ।
सोमबार अपर तामाकोसी हाइड्रोपावरको सर्वाधिक ३७ करोड ८ लाख रुपैयाँको सेयर किनबेच भएको छ । निफ्राको २१ करोड ५८ लाख रुपैयाँको सेयर कारोबार भएको छ । जानकी फाइनान्स कम्पनीका लगानीकर्ताले सर्वाधिक गुमाएका छन्। यस कम्पनीका लगानीकर्ताले १० प्रतिशत बढीले गुमाएका हुन।
एक कम्पनीको सेयर भाउमा सकारात्मक सर्किट लागेको छ । सिभिल डिबेन्चरको सेयर मूल्य १० प्रतिशत र माण्डू हाइड्रोपावरका लगानीकर्ताले ९.९९ प्रतिशतले कमाएका छन्।