६ वैशाख/अर्थ र व्यापार – साताको अन्तिम कारोबार दिन बिहीबार पनि सेयर बजार परिसूचक नेप्से १९.५६ अंकमा झरेको छ । यसअघि पनि घटिरहेको नेप्से अघिल्लो दिनको तुलनामा बिहीबार १९.५६ अंकले तल झरेको हो ।
यो अंकको गिरावटपछि नेप्से १९ सय ७२ अंकमा कायम भएको छ । यसदिन कुल २ अर्ब ९ करोडको कारोबार भएको थियो ।
कुल २ सय ११ वटा कम्पनीको मूल्य घट्दा २७ वटाको बढ्यो भने ६ वटाको स्थिर रह्यो । बैंकिङ ०.४८, विकास बैंक १.४६, फाइनान्स ०.८५, होटल तथा पर्यटन १.०४, हाइड्रोपावर १.१६, जीवन बीमा ०.५१, उत्पादन १.५४, माइक्रोफाइनान्स १.७२, निर्जीवन बीमा ०.८७, अन्य १.२५ र ब्यापार समूह १.१७ प्रतिशत घटेका छन् ।
यसैगरी, खानीखोला हाइड्रोपावरको मूल्य सबैभन्दा धेरै ७.९ प्रतिशत बढ्यो । पोखरा फाइनान्सको ६.२, मध्यभोटेकोशीको ५.७, पिपुल्स पावरको ५.५, जोशी हाइड्रोको ४.५, माइखोला हाइड्रोपावरको ४.३ प्रतिशत मूल्य बढेको थियो ।
यसदिन रुरु हाइड्रोपावरको मूल्य १० प्रतिशत घट्यो । कम्पनीको संस्थापक तथा प्रभावित स्थानीयको सेयरमा लकइन अवधि सकिएसँगै मूल्यमा गिरावट देखिएको हो । त्यस्तै गोर्खाज फाइनान्सको ९.३, सीवाईसी लघुवित्तको ६.१२ प्रतिशत मूल्य घट्यो ।
कारोबार रकमका आधारमा गोर्खाज फाइनान्स, सूर्यज्योति लाइफ इन्स्योरेन्स, पोखरा फाइनान्स, शिवम् सिमेन्ट र हिमालयन रिइन्स्योरेन्स क्रमशः अगाडि रहे ।