४ बैशाख/अर्थ र व्यापार – यस साता सेयर कारोबारको तेस्रो दिन मंगलबार नेप्से परिसूचक २ हजार अंकबाट पनि तल ओर्लिएको छ । मंगलबार नेप्से परिसूचक अघिल्लो दिनको तुलनामा १४ दशमलब ८१ अंक घटेर १९ सय ९१ अंकमा ओर्लिएको हो ।
गत २० फागुन यता नेप्से परिसूचक २ हजार अंक भन्दा माथि रहँदै आएको थियो । यस दिन कारोबार रकम जम्मा २ अर्ब १० करोडमा खुम्चिएको छ । अघिल्लो दिन सोमबार २ अर्ब ७९ करोड रुपैयाँको कारोबार भएको थियो ।
मंगलबार ४२ वटा कम्पनीको मूल्य बढ्दा २ सय वटाको घट्यो भने २ वटाको स्थिर रह्यो । सबै समूहका सूचकहरु घटेका थिए । अन्य, माइक्रोफाइनान्स र हाइड्रोपावर समूहका सूचक १ प्रतिशत भन्दा धेरै घटेका थिए । बैंकिङ ४, विकास बैंक ७, फाइनान्स ९, होटल तथा पर्यटन १४, हाइड्रोपावर ३२, जीवन बीमा ५५, उत्पादन ३८, माइक्रोफाइनान्स ४७, निर्जीवन बीमा ७८, अन्य १८ र ब्यापार उप समूह २३ अंकले घटेको थियो ।
यस्तो अवस्थाकाबीच पनि गोर्खाज फाइनान्सको मूल्य भने १० प्रतिशत बढेको थियो । ग्रीन डेभलपमेन्ट बैंकको ५, दिव्यश्वरी हाइड्रोपावरको ४, इमर्जिङ नेपालको २ दशमलब ९ प्रतिशत मूल्य बढेको थियो । रुरु हाइड्रोपावरको मूल्य १० प्रतिशत घटेको थियो । यस कम्पनीको सेयरमा संस्थापक तथा प्रभावित स्थानीयको लकइन पिरियड सकिएपछि मूल्यमा उच्च गिरावट देखिएको छ ।
यसैगरी, पोखरा फाइनान्सको ६ दशमलब ७, सीवाईसी लघुवित्तको ६ दशमलब ५, दोल्ती पावरको ५ दशमलब ६, जनउत्थान लघुवित्तको ५ प्रतिशत मूल्य घटेको थियो । मंगलबार कारोबार रकमका आधारमा गोर्खाज फाइनान्स, सूर्यज्योति लाइफ इन्स्योरेन्स, पोखरा फाइनान्स, सर्वोत्तम सिमेन्ट र शिवम् सिमेन्ट क्रमशः अगाडि रहेका थिए ।
तपाईको प्रतिक्रिया