१९ चैत/अर्थ र व्यापार – सेयर बजारको गिरावटले सोमबार पनि निरन्तरता पाएको छ । यस दिन नेप्से परिसूचक अघिल्लो दिन आइतबारको तुलनामा ६.२६ अंक घटेर २०१२ मा कायम भएको छ ।
यस दिन नेप्सेसँगै कारोबार रकम पनि घटेको छ । अघिल्लो दिन ३ अर्ब २० करोड रुपैयाँको कारोबार भएकोमा सोमबार २ अर्ब ८७ करोडमा खुम्चिएको थियो । यसदिन ८६ वटा कम्पनीको मूल्य बढ्दा १ सय ५१ वटाको घट्यो भने ८ वटाको स्थिर रह्यो ।
क्षेत्रगत सूचक हेर्दा होटल तथा पर्यटन समूहको सूचक १.१६ तथा ब्यापार ०.२० प्रतिशत बढेका थिए । अरु सबै क्षेत्रका सूचक १ प्रतिशत भन्दा न्यून दरमै घटेका थिए । बैंकिङ ४.३, विकास बैंक २.८, फाइनान्स १२.७, हाइड्रोपावर १३.६, जीवन बीमा १५.९, उत्पादन २१.९, माइक्रोफाइनान्स ५.३, निर्जीवन बीमा ४२.२ र अन्य समूह ६ अंक घटेका थिए ।
गुराँस लघुवित्त र माइखोला हाइड्रोपावरको १० प्रतिशत बढ्यो । माहुली लघुवित्तको ९.४४, तारागाउँ रिजेन्सीको ७.२५, दोल्ती पावरको ५.४१, सिक्लेस हाइड्रोपावरको ५.२१ प्रतिशत मूल्य बढेका थिए ।