६ फागुन/अर्थ र व्यापार – सेयर बजारमा आइतबार २७.२१ अंकको गिरावट आएको छ। नेप्से परिसूचक २०३४.८२ विन्दुमा झरेको छ। १३ वटै उपसमूहले नेप्से घटाएका हुन्। वित्त उपसमूहको सूचक सबैभन्दा धेरै २.७० प्रतिशतले ओरालो लागेको छ ।
आइतबार जलविद्युत उपसमूहमा पनि २.१५ प्रतिशतको गिरावट आएको छ। साम्लिङ पावर कम्पनीको सेयर मूल्य सबैभन्दा धेरै ८.२१ प्रतिशतले घटेको छ।
२२५ कम्पनीको सेयर भाउ सस्तिंदा २१ कम्पनीका लगानीकर्ताले भने कमाएका छन्। बोटलर्स नेपाल बाजालु र समाज लघुवित्तको सेयर मूल्य १० प्रतिशतले वृद्धि भएको छ। घटेको बजारमा किसान लघुवित्तको सेयर मूल्य ८.२२ र युनियन हाइड्रोपावरको सेयर मूल्य ६.६५ प्रतिशतले बढेको छ।
बजारमा १ करोड ७ लाख ७२ हजार ४८३ कित्ता सेयर ३ अर्ब ७७ करोड ५४ लाख २२ हजार रुपैयाँमा किनबेच भएको छ।
हिमालयन रि इन्स्योरेन्सको सेयर सर्वाधिक किनबेच भएको छ। यो कम्पनीको ४० करोड ९० लाख रुपैयाँको सेयर किनबेच भएको हो। धेरै रकमको कारोबार हुने सूचीमा एनआईसी एसिया बैंक दोस्रो स्थानमा छ। यो कम्पनीको १३ करोड ६५ लाख रुपैयाँको सेयर किनबेच भएको थियो ।