१५ असोज/अर्थ र व्यापार – धितोपत्र ब्रोकर्स एशोसिएसन नेपालले विश्व लगानीकर्ता सप्ताह २०२३ को अवसरमा विभिन्न कार्यक्रम आयोजना गर्ने भएको छ । एशोसिएसनका अध्यक्ष सागर ढकालले यस्तो जानकारी गराएका हुन ।
अध्यक्ष ढकालका अनुसार एशोसिएसनले विश्व लगानीकर्ता सप्ताहको पारेर साताव्यापी विभिन्न कार्यक्रमहरु सञ्चालन गर्न लागेको छ । एशोसिएसनले तय गरेको कार्यक्रमको तालिका अनुसार यहि १६ देखि १९ असोजसम्म कलेजहरुमा शेयर सचेतना तथा तालिम कार्यक्रम गर्ने छ ।
१६ असोजमा रिलायन्स कलेज सरस्वतीनगर, काठमाण्डौमा,१७ असोजको दिन क्यातफोर्ड इन्टरनेशनल कलेज बालकुमारी, ललितपुरमा, १८ असोजको दिन सेन्ट्रल डिपार्टमेन्ट आफ म्यानेजमेन्ट, त्रिभुवन विश्वविद्यालय, किर्तिपुरमा र आगामी १९ असोजमा काभ्रेको पनौती नगरपालिका पनौतीमा शेयर सचेतना तथा तालिम हुने एशोसिएसनले जनाएको छ ।
यसैगरी, एशोसिएसनले आगामी २० असोजमा वाकाथन कार्यक्रम गर्ने बताएको छ । सो दिन बिहान ८ बजेबाट नेपाल धितोपत्र बोर्डका अध्यक्ष रमेशकुमार हमालको नेतृत्वमा व्यानर तथा प्लेकार्ड सहित भृकुटीमण्डपबाट सुरु भएको वाकाथन बसन्तपुर दरबार स्क्वायर सम्म पुगेर भेलामा परिणत भई समापन गरिने छ ।
साताव्यापी विश्व लगानीकर्ता सप्ताह–२०२३ समापन तथा अन्तरक्रिया कार्यक्रमकै अवसरमा आगामी २१ असोजकोे दिउँसो ३ बजेबाट नेपाल धितोपत्र बोर्डको अध्यक्ष रमेश कुमार हमाल प्रमुख आतिथ्य तथा नेपाल स्टक एक्सचेन्ज लिमिटेडका प्रमुख कार्यकारी अधिकृत कृष्णबहादुर कार्की तथा सिडिएस एण्ड क्लियरिंग लिमिटेडका प्रमुख कार्यकारी अधिकृत पूर्णप्रसाद आचार्यहरुको आतिथ्यमा साताव्यापी लगानी सप्ताह कार्यक्रमको विसर्जन तथा पूँजीबजार विकास सम्बन्धमा अन्तरक्रिया कार्यक्रम गर्ने एशोसिएसनले जनाएको छ ।
तपाईको प्रतिक्रिया