२१ भदौ/अर्थ र व्यापार – हाथवे इन्भेष्टमेन्ट नेपाल लिमिटेडले सर्वसाधारणकालागि साधारण सेयर जारी गरेको छ । कम्पनीको आइपीओमा बिहीबारदेखि आवेदन खुला भएको छ।
कम्पनीले जारी पुँजी १ अर्ब १७ करोडको १२.५० प्रतिशतले हुन आउने १४ करोड ६२ लाख ५० हजार रुपैयाँ बराबरको २९ लाख २५ हजार कित्ता साधारण सेयरका लागि छुट्याएको छ।
छुट्याएको सेयरको १० प्रतिशतले हुन आउने २ लाख ९२ हजार ५०० कित्ता कम्पनीले वैदेशिक रोजगारीमा गएका नेपालीलाई बिक्री गरिसकेको छ । २ प्रतिशतले हुन आउने ५८ हजार ५०० कित्ता सेयर कम्पनीले आफ्ना कर्मचारीका लागि छुट्याएको छ ।
यस्तै ५ प्रतिशतले हुन आउने १ लाख ४६ हजार २५० कित्ता साधारण सेयर कम्पनीले सामूहिक लगानी कोष योजनाका लागि बिक्री गर्ने छ ।
बाँकी रहेको २४ लाख २७ हजार ७ सय ५० कित्ता सेयरमा भने सर्वसाधारणले खरिद आवेदन दिन सक्नेछन् । कम्पनीको सेयरमा लगानीकर्ताले प्रतिकित्ता ५० रुपैयाँका दरले आवेदन दिनुपर्ने छ।
दरखास्त न्युनतम २० कित्ता र अधिकतम १ लाख कित्ताका लागि दिन पाइन्छ। कुनै लगानीकर्ताले २० कित्ताभन्दा बढीका लागि सेयर खरिद आवेदन दिनुपरे २० अंकको गुणांकमा आवेदन दिनुपर्ने छ।
आवेदन छिटोमा बिहीबारदेखि आगामी सोमबारसम्म (भदौ २१–२५) आवेदन दिन सकिन्छ। यो अवधिमा लगानीकर्ताहरुबाट पर्याप्त आवेदन नपरे कम्पनीले सेयर निष्कासनको समय आगामी ४ असोजसम्म थपगर्ने योजना रहेको सो कम्पनीले जनाएको छ ।