१ भदौ/अर्थ र व्यापार – हिमालयन सेक्युरिटिज र सनी सेक्युरिटिजले पुर्ण कार्य गर्ने धितोपत्र दलाल अनुमतिपत्र प्राप्त गरेका छन् । धितोपत्र बोर्डले बिहीबार थप ५ वटा ब्रोकरलाई सञ्चालन अनुमति प्रदान गरेको हो ।
बोर्डको निर्णय अनुसार बिहीबार सजिलो ब्रोकर, रोडसो सेक्युरिटिज, बेनी सेक्युरिटिज, हिमालयन सेक्युरिटिज र सनि सेक्युरिटिजले अनुमति पाएका हुन् । सजिलो, रोडसो र बेनीले सिमित कार्य गर्ने धितोपत्र दलाल अनुमतिपत्र प्राप्त गरेका हुन् ।
धितोपत्र बोर्डले ब्रोकर लाइसेन्सका लागि आवेदन दिने ४५ मध्ये ४३ वटालाई लाइसेन्स दिने निर्णय गरेको थियो । यसरी लाइसेन्स पाउने प्रारम्भिक अनुमति पाएकाले सम्पुर्ण प्रक्रिया पुरा गरेर क्रमश ब्रोकर लाइसेन्स लिइरहेका छन् ।
पुर्ण कार्य गर्ने ब्रोकरको न्युनतम चुक्ता पूँजी ६० करोड रुपैयाँ तोकिएको छ । सिमित कार्य गर्ने धितोपत्र दलाल सेवा प्रवाह गर्ने ब्रोकरका लागि न्युनतम चुक्ता पूँजी २० करोड रुपैयाँ तोकिएको छ ।
यसैगरी, पुर्ण कार्य गर्ने धितोपत्र दलाल सेवा प्रवाह गर्ने ब्रोकरका लागि ६० करोड रुपैयाँ तोकिएको छ । धितोपत्र व्यापारीको लागि भने एक अर्ब ५० करोड रुपैयाँ रहेको छ ।
सिमित कार्य गर्ने ब्रोकरले लाइसेन्सका लागि निवेदन दिदा ५० हजार रुपैयाँ, अनुमतिपत्र दस्तु बापत २५ लाख रुपैयाँ र वार्षिक शुल्क बापत एक लाख ५० हजार रुपैयाँ भुक्तानी गर्नु पर्छ । त्यस्तै, पुर्ण कार्य गर्ने ब्रोकरहरुले लाइसेन्सका लागि आवेदन दिदा एक लाख रुपैयाँ, अनुमतिपत्र दस्तुर बापत ५० लाख रुपैयाँ र वार्षिक शुल्क तीन लाख रुपैयाँ भुक्तानी गर्नुपर्छ ।
त्यस्तै, धितोपत्र व्यापारीको हकमा निवेदन दस्तुर २ लाख, अनुमतिपत्र दस्तुर एककरोड रुपैयाँ र वार्षिक शुल्क ५ लाख रुपैयाँ भुक्तानी गर्नुपर्छ । प्रतिलिपि शुल्क भने २५ हजार रुपैयाँ तिर्नुपर्छ ।