३ असार/अर्थ र व्यापार– नयाँ स्टक ब्रोकर एसोसिएसनका अध्यक्ष सागर ढकालको नेतृत्वमा गएको प्रतिनिधीले आइतबार पूर्व प्रधानमन्त्री तथा नेकपा एमालेका अध्यक्ष केपी शर्मा ओलीलाई भेटेर ज्ञापनपत्र बुझाएको छ । एसोसियसनले अर्थ समितिको निर्देशनपछि रोकिएको नयाँ स्टक ब्रोकर लाईसेन्सको प्रक्रिया खुलाएर तत्काल कारोबार सञ्चालन गर्न सहजिकरण गराउनका लागि पहल गरिदिन पूर्व प्रधानमन्त्री तथा एमालेका अध्यक्ष ओलीलाई ज्ञापनपत्र बुझाएर यस्तो अनुरोध गरेको हो ।
उनीहरुको आग्रहपछि नयाँ स्टक ब्रोकर एसोसिएसनका प्रतिनिधीहरूसँग ओलीले रोकिएको ब्रोकर लाईसेन्स खुलाउन आफ्नो पार्टीको ध्यानाकर्षण भएको आश्वासन दिए । ओलीले रोकिएको ब्रोकर लाईसेन्स खुलाउन आफूले सक्दो प्रयास गर्ने बताए ।
अर्थ समितिले न्यूनतम मापदण्ड पूरा गरेको वा नगरेको सम्बन्धमा अध्ययन गर्ने भन्दै तत्कालका लागि नयाँ स्टक एक्सचेञ्ज र नयाँ ब्रोकर लाइसेन्स वितरण प्रक्रिया रोक्न माग गरेको छ । अर्थ समितिको सो निर्देशनपछि ब्रोकर लाईसेन्स पाएका नयाँ सञ्चालकहरू मारमा परेका छन् । कारोबार सुरू गर्न भनेर सबै तयारी पुरा गरिसकेका नयाँ स्टक ब्रोकरहरू यतिबेला तनावमा परेका छन । उनीहरुलाई आफ्नो लगानी धरासायी हुने चिन्ता छ ।
यस्तो अन्योलताकाबीच अहिले नयाँ स्टक ब्रोकर एशोसिएशनका प्रतिनिधीहरु अर्थ समितिको निर्देशनको विरोधमा उत्रिएका छन । उनीहरुले अर्थ समितिको निर्देशन तत्काल खारेज हुनुपर्ने माग गरेका छन ।