७ बैशाख/अर्थ र व्यापार – पछिल्लो समय सेयर कारोबारमा लगानी गर्दा निजी लगानीकर्ता मात्र नभएर नेपाल सरकार पनि डुबेको छ । सरकारले ११४ वटा कम्पनीमा ३ खर्ब ५७ अर्ब ६३ करोड ८९ लाख रुपैयाँ बराबरको सेयर लगानी गरेको छ ।

यि विभिन्न कम्पनीहरुबाट सरकारले आर्थिक वर्ष २०७८/७९ मा १ दशमलब १८ प्रतिशत मात्र नगद लाभांश पाएको छ । सरकारले विभिन्न ११४ वटा कम्पनीहरुमा सेयर लगानी गरेको मध्ये जम्मा ९ वटा कम्पनीले मात्र नगद लाभांश दिएका छन् । यहि अनुसार १०५ वटा कम्पनीमा गरिएको सेयर लगानीबाट सरकारले लाभांश पाउन नसकेको हो ।

गत आर्थिक वर्षमा ९ कम्पनीले सरकारलाई ४ अर्ब २४ करोठ ३७ लाख रुपैयाँ नगद लाभांश दिएका छन् । जुन अघिल्लो आर्थिक वर्षको तुलनामा ६६ दशमलब ७२ प्रतिशत कम रहेको महालेखा परिक्षकको ६० औं प्रतिवेदनमा उल्लेख गरिएको छ ।

सेयर लगानीको प्रतिफल कम भएपनि सरकारले सेयर लगानी भने बढाउँदै लगेको छ । गत आर्थिक वर्षमा मात्र सरकारले सेयरमा १५ अर्ब ५२ करोड ७८ लाख रुपैयाँ थप लगानी गरेको छ । १०५ वटा कम्पनीको सेयरमा सरकारले २ खर्ब ५८ अर्ब ७८ करोड २२ लाख रुपैयाँ बराबर लगानी गरेको छ ।

सो लगानीको प्रतिफल शुन्य रहेको महालेखाको प्रतिवेदनमा उल्लेख गरिएको छ । ११४ संस्था मध्ये ६९ वटा पूर्ण सरकारी स्वामित्वका सार्वजनिक संस्थान छन् । त्यसमा ४२ वटा संस्थान मात्र सञ्चालनमा रहेका छन् ।