१८ फागुन/अर्थ र व्यापार– कृषि विकास बैंक लिमिटेडले यस वर्षको २० प्रतिशत बोनस शेयर सम्बन्धीत शेयरधनीहरुको डिम्याट (हितग्राही) खातामा जम्मा गरेको छ । बैंकले २९ पुसमा सम्पन्न १५औं वार्षिक साधारण सभाबाट पारित सो बोनस सेयर वितरण गर्न सूरु गरेको हो । बोनस सेयर फागुन १५ गते बैंकले धितोपत्र दोस्रो बजारमा सूचीकृत समेत गराईसकेको छ । त्यसैले डिम्याट खातामा प्राप्त बोनस शेयर सदस्यहरुले कारोबार गर्न सक्ने सो बैंकले जनाएको छ ।
बैंकले गत १५ पुससम्म सेयर अभौतिकीकरण गराएका सदस्यहरुको डिम्याट खातामा बोनस सेयर जम्मा गरिसकेको जानकारी दिएको हो । त्यसपछि पनि सेयर अभौतिकीकरण गराएका सदस्यहरुको डिम्याट खातामै क्रमश सेयर जम्मा गरिने भनाई पनि सो बैंकको छ । यसर्थ हालसम्म आफ्नो सेयर अभौतिभीकरण नगराएका सदस्यहरुले यथासिघ्र गराई बोनस सेयर सुरक्षित गर्न पनि सो बैंकले आग्रह गरेको जनाएको छ ।
गत १५ पुससम्म सेयर धितो बन्धक राखी कर्जा लिएका सदस्यहरुको हकको बोनस सेयर भर्ने सम्बन्धीत कम्पनीकै नाममा रोक्का रहेकाले फुुकुवा भएको खण्डमा सम्बन्धीत कम्पनीमै सम्पर्क राख्न पनि सो बैंकले भनेको छ ।
कम्पनीले यस वर्ष बोनस सेयरसँगै कर प्रयोजनका लागि १ दशमलव ०५३ प्रतिशत नगद लाभांश समेत दिएकाले सेयरधनीहरुले बोनस सेयरमा लाग्ने कर तिर्नुपर्ने छैन् । यस बैंकको सेयर रजिष्ट्रारमा एनआईबिएल एस क्यापिटल लिमिटेड रहेको सो बैंकले जनाएको छ ।