१४ कात्तिक / अर्थ र व्यापार – सरकारले नेपाल स्टक एक्सचेन्जमा रिक्त रहेको प्रमुख कार्यकारी अधिकृत (सीईओ ) छनोटका लागि प्रक्रिया सुरु गरेको छ । जसका लागि अहिले सरकारले दरखास्त आह्वान गरी छनोटको प्रक्रिया अघि बढाएको छ । 
खुला प्रतिस्पर्धामार्फत नयाँ सीईओ नियुक्तिका लागि सार्वजनिक सूचना जारी गर्दै अर्थमन्त्रालयले दरखास्त आह्वान गरेको हो । जसका लागि योग्य आवेदकलाई आगामी १५ दिनभित्र आवेदन दिन आह्वान गरिएको अर्थ मन्त्रालयले जनाएको छ । 
मन्त्रालयका अनुसार तत्कालिन सीईओ चन्द्रसिंह साउदले सेयर खरिद विवादमा परेर राजीनामा दिएपछि नेप्से कार्यकारी प्रमुखविहीन बनेको थियो । बुक बिल्डिङमार्फत साधारण सेयर (आईपीओ) निष्कासनको तयारीमा रहेको सर्वोत्तम सिमेन्टको सेयर साउदको श्रीमतीको नाममा भेटिएपछि उनी विवादमा तानिएका थिए ।
सर्वोत्तमकै सेयर खरिद विवादमा परेका नेपाल धितोपत्र बोर्डका अध्यक्ष भीष्मराज ढुंगानालाई भने सरकारले बर्खास्त गरेको थियो । बोर्डको नयाँ अध्यक्ष नियुक्तिका लागि पनि सरकारले दरखास्त आह्वान गरिसकेको छ ।