२४ साउन/अर्थ र व्यापार– साताको पहिलो कारोबार दिन आइतबार सेयर बजार परिसूचक नेप्सेमा सामान्य वृद्धि भएको छ।

आइतबार नेप्से परिसूचक ०.६६ अंकले बढेर ३१०८.१२ विन्दुमा पुगेको छ । आज कुल २२७ कम्पनीका २ करोड ६९ लाख ६९ हजार कित्ता माथिको सेयर १ लाख २६ हजार बढी पटक बजारमा किनबेच हुँदा १४ अर्ब ३० करोड ८१ लाखको कारोबार भएको छ ।

धेरै कारोबार हुने १० कम्पनीमा सबै जलविद्युत कम्पनी परेका छन् । कारोबारका आधारमा अपि पावर कम्पनीको ८१ करोड रुपैयाँको कारोबार हुँदा दोस्रोमा रहेको अरुणभ्यालीको ६० करोड र तेस्रोमा रहेको युनिभर्सल पावरको ५४ करोडको कारोबार भयो ।

आज बैंकिङ ०.०३ अंकले घटेको छ । होटल तथा पर्यटन ३९.९, जीवन बीमा १२५, लघुवित्त ७४, निर्जीवन बीमा २०२, अन्य २० रब्यापार ४० अंकले घटेका छन् । भने विकास बैंक ६६, फाइनान्स २१, जलविद्युत ११५ र उत्पादन समूह ६ अंकले बढेका छन् । 

आइतबार जलविद्युत कम्पनीका लगानीकर्ताहरुले सबैभन्दा बढी कमाएका छन् । आज अपि पावर, युनिभर्सल पावर र ङादी ग्रुपको मूल्य १० प्रतिशतले बढ्यो ।

कर्पोरेट डेभलपमेन्ट बैंक, जीवन विकास लघुवित्त र युनियन लाइफ इन्स्योरेन्सको मूल्य पनि १० प्रतिशतले बढ्यो । 
आजको कारोबारपछि युनियन लाइफको मूल्य प्रतिकित्ता ५३० रुपैयाँ ९० पैसा पुगेको छ भने जीवन विकासको १६५६ रुपैयाँ ८० पैसा पुगेको छ । 

कर्णाली विकास बैंक र छ्याङ्दी हाइड्रोको मूल्य ९ प्रतिशतले बढ्यो। गुराँस लघुवित्तको मूल्य सबैभन्दा धेरै ४ प्रतिशतले घटेको छ। जनउत्थान सामुदायिक, सबैको, महिला र कालिका लघुवित्तको मूल्य ३ प्रतिशतभन्दा धेरैले घटेको छ ।