३ पुस/अर्थ र व्यापार– वीरगञ्जमा एक अर्ब रुपैयाँको लागानीमा चार तारे रिसोर्ट क्लर्क्स सञ्चालनमा आएको छ।

हिमाल वाटर पार्क एण्ड भिलेज होटल प्रालिले वीरगञ्जको गण्डकमा क्लर्क्स रिसोर्ट सञ्चालनमा ल्याएको हो । रिसोर्टको व्यवस्थापन भारतको होटेल चेन क्लर्क्सले गरेको छ । 

हिमाल वाटर पार्क एण्ड भिलेज होटल प्रालिका अध्यक्ष सुनीलकुमार खेतानले क्लर्क्सको भारतबाहिर यो पहिलो फ्रेन्चाइज रिसोर्ट भएको बताए । 

खेतानले अहिले आंशिक रुपमा सञ्चालन भएको रिसोर्ट आगामी वर्षको दीपावलीदेखि पूर्ण क्षमतामा चल्ने बताए। २ विगाह क्षेत्रफलमा खुलेको रिसोर्टमा अहिले ३ ओटा ब्याङ्क्वेट, ३ ओटा कन्भेन्सल हल र रेष्टुरेन्ट सञ्चालनमा आएको छ ।

रिसोर्टलाई निकट भविष्यमै पाँच तारे पूर्वाधारमा स्तरोन्नति गर्ने कम्पनीको योजना छ । ६० कोठासहितको संरचनामा तयार भइरहेको रिसोर्टमा ४ एक्जुक्युटिभ सुइट, ८÷८ ओटा एक्जुक्युटिभ र सुइट कोठा, १६ ट्वीन र २ दर्जन किंग रुम हुनेछन् ।

रिसोर्टमा स्विमिंग पुल, जिम, साउना, बार, रेष्टुरेन्ट, लन्ज, क्यासिनो, २५० जना क्षमताका ओपेन एयर थियेटर, ओपेन एयर रेष्टुरेन्ट र २ हजार जना क्षमताको ब्यांक्वेट लगायतका सुविधा रहेको छ । 

रिसोर्टले वीरगञ्ज तथा छिमेकी भारतका ग्राहकलाई लक्षित गरेको छ ।