१३ पुस/अर्थ र व्यापार– नेपाल आयल निगमले एक वर्षको अवधिमा रू. १२ अर्ब ८७ करोड नाफा कमाएको छ । लामो समयदेखि घाटामा रहेको निगम पछिल्ला वर्षमा नाफामा गएको हो ।

निगमले सार्वजनिक गरेको गत आर्थिक वर्ष २०७६/७७ को अन्तिम लेखापरीक्षण प्रतिवेदन अनुसार कोभिड–१९प्रभाव र गत चैत ११ गतेदेखि गरिएको बन्दाबन्दीकाबीच समग्रमा पाँच प्रतिशतको हाराहारीमा मुनाफा आर्जन गर्न सफल भएको हो ।

मोतिहारी अमलेखगञ्ज पेट्रोलयम पाइपलाइनबाट इन्धन आयात हुँदा ढुवानी रकम बचत हुनु,का अघिल्ला वर्षको नाफा रकमको ब्याज आम्दानी, अन्तरराष्ट्रिय बजारमा पछिल्ला वर्ष इन्धनको मूल्य घट्नु र निगमले स्वचालित मूल्य प्रणाली लागू गर्दै गएपछि नाफामा वृद्धि भएको प्रतिवेदनमा उल्लेख छ ।

निगमका कार्यकारी निर्देशक शुरेन्द्र पौडेलले ब्याज आम्दानी, ढुवानी खर्चमा भएको बचत तथा एलपिजी ग्यासमा दिँदै आएको अनुदान घटेका कारण आर्थिक वर्ष २०७६/७७ मा निगमको नाफा बढेको बताए । 

दश महीनाको अवधिमा निगमले पाइपलाइनबाट डिजेल ढुवानी गर्दा रू. १ अर्ब ४७ करोड बचत भएको प्रतिवेदनमा उल्लेख छ । भने गत वर्षको नाफा रकमको बैंक ब्याजबाट मात्रै १ अर्ब ७७ करोड आम्दानी भएको निगमको जानकारी दिएको छ ।

निगमले आव २०७२/७३ मा रू. १९ अर्ब ३६ करोड, आव २०७३/७४ मा रू. ९ अर्ब ४५ करोड, २०७४/७५ मा रू.तीन अर्ब ५८ करोड, २०७५/७६ मा ८ अर्ब ७५ करोड र गत आव २०७६/७७ मा रू. १२ अर्ब ८७ करोड नाफा कमाएको छ ।

निगमले गत आवमा सरकारलाई रू. ६६ अर्ब ८८ करोड राजस्व बुझाएको प्रतिवेदनमा उल्लेख छ ।