१ साउन/अर्थ र व्यापार– अघिल्लो आर्थिक वर्ष २०७३/७४ मा भन्दा आर्थिक वर्ष २०७४/७५ मा दोब्बर बढी लगानी भित्रिएको छ ।

आर्थिक वर्ष २०७४/७५ को अन्त्यमा ३ खर्ब ५० अर्ब ५९ करोड रुपैयाँ बराबरका उद्योग विभागमा दर्ता भएको उद्योग विभागले जनाएको छ । आर्थिक वर्ष २०७३/७४ को अन्त्यमा एक खर्ब ६३ अर्ब १७ करोड रुपैयाँ बराबरका उद्योग विभागमा दर्ता भएका थिए । 
अघिल्लो आर्थिक वर्षको तुलनामा उद्योगको संख्या कम भएपनि लगानी भने दोब्बर बढी भएको हो । अघिल्लो वर्ष ५१० वटा उद्योग दर्ता भएकोमा गत वर्ष ४९६ वटा उद्योगमात्रै दर्ता भएका छन् ।

रोजगारी प्रतिवद्धता पनि अघिल्लो वर्षको भन्दा बढी भएको छ । अघिल्लो वर्ष २६ हजार ५३० जनालाई रोजागरीको प्रतिवद्धता भएकोमा गत आर्थिक वर्षमा २७ हजार ३३९ जनालाई रोजगारीको प्रतिवद्धता गरिएको छ ।

अघिल्लो आर्थिक वर्षमा उर्जाका २० उद्योगमा ८२ अर्ब ४० करोड रुपैयाँ बराबरको लगानी प्रतिवद्धता भएकोमा गत आर्थिक वर्षमा ३९ उद्योगमा दुई खर्ब ३४ अर्ब रुपैयाँ लगानी प्रतिवद्धता भएको छ। यो अघिल्लो आर्थिक वर्षको तुलनामा तेब्बर बढी लगानी प्रतिवद्धता हो ।

उर्जा क्षेत्रमा आएको यो लगानी प्रतिवद्धता गत आर्थिक वर्षमा आएको जम्मा लगानी प्रतिवद्धताको दुई तिहाई लगानी हो ।
स्वदेशीसँगै विदेशी लगानीकर्ताको रोजाइमा पनि जलविद्युत आयोजना परेकोले उर्जा क्षेत्रमा व्यापक लगानी प्रतिवद्धता भएको उद्योग विभागका प्रवक्ता दुर्गाप्रसाद भुषालले बताए ।

यस्तै उत्पादनमुलक उद्योगमा पनि गत वर्षको तुलनामा झण्डै दोब्बर लगानीको प्रतिवद्धता भएको छ। अघिल्लो आर्थिक वर्षमा १२५ उद्योगमा ४३ अर्ब ९६ करोड रुपैयाँ बराबरको लगानी प्रतिवद्धता भएकोमा गत आर्थिक वर्षमा १३० उद्योगमा ७७ अर्ब २६ करोड रुपैयाँ बराबरको लगानी प्रतिवद्धता भएको छ ।

पर्यटन उद्योगमा पनि अघिल्लो आर्थिक वर्षमा १५४ उद्योगमा १५ अर्ब रुपैयाँ लगानी प्रतिवद्धता भएकोमा गत आर्थिक वर्षमा १५९ उद्योगमा २३ अर्ब ८५ करोड रुपैयाँ लगानी प्रतिवद्धता भएको छ । 

यस्तै निर्माण उद्योगतर्फ अघिल्लो आर्थिक वर्षमा तीन उद्योगमा एक अर्ब ६९ करोड रुपैयाँ लगानी प्रतिवद्धता भएकोमा गत आर्थिक वर्षमा चार उद्योगमा चार अर्ब ७३ करोड रुपैयाँ लगानी प्रतिवद्धता भएको छ ।

अघिल्लो आर्थिक वर्षमा तीन खनिज उद्योगमा आठ करोड रुपैयाँ मात्र लगानी प्रतिवद्धता भएकोमा गत आर्थिक वर्षमा चार खनिज उद्योगमा दुई अर्ब ४२ करोड रुपैयाँ लगानी प्रतिवद्धता भएको छ ।

सेवा, सूचना प्रविधि र कृषिजन्य उद्योगमा पनि लगानी घटेको छ । अघिल्लो आर्थिक वर्षमा १६६ सेवामुलक उद्योगमा १५ अर्ब ८७ करोड रुपैयाँ लगानी प्रतिवद्धता भएकोमा गत आर्थिक वर्षमा ११४ वटा सेवामुलक उद्योगमा पाँच अर्ब १३ करोड रुपैयाँ मात्र लगानी प्रतिवद्धता भएको छ । 

अघिल्लो आर्थिक वर्षमा २५ वटा कृषिजन्य उद्योगमा तीन अर्ब २६ करोड रुपैयाँ लगानी प्रतिवद्धता भएकोमा गत आर्थिक वर्षमा २२ उद्योगमा दुई अर्ब ५२ करोड रुपैयाँ मात्र लगानी प्रतिवद्धता भएको छ ।

त्यसैगरी अघिल्लो आर्थिक वर्षमा १४ वटा सूचना प्रविधि उद्योगमा ९० करोड रुपैयाँ लगानी प्रतिवद्धता भएकोमा गत आर्थिक वर्षमा २४ उद्योगमा ७५ करोड रुपैयाँ मात्र लगानी प्रतिवद्धता भएको छ ।