११ फागुन/अर्थ र व्यापार- आगामी चैत ५ देखि १४ गतेसम्म चन्द्रागिरि–१०, सतुंगल विन्ध्यपरिसरमा श्रीमददेवीभागवत एवं महारूद्र विराट महायज्ञ आयोजना हुने भएको छ । नेपालको मध्यभाग पाशुपत क्षेत्र सन्निकट चन्द्रागिरी १० मा सम्पूर्ण मानव मनहरूमा आध्यात्मिक भावधारा प्रवाह गरी विश्वबन्धुत्व कायम गर्न अथक साधनारत जगदाचार्य श्री नेपाली बाबाद्वारा संकल्पित जगन्माता विन्ध्यवासिनी देवीको यन्त्रमय मन्दिरको परिकल्पना सहित स्थापना गरिएको विन्ध्यवासिनी आध्यात्मिक संघ (जगदाचार्य पीठ), विन्ध्यपरिसरमा श्रीमददेवीभागवत एवं महारुद्र विराट् महायज्ञको आयोजना गरिएको हो ।

यस विराट् महायज्ञमा पूर्वीय सभ्यताका आधार धर्मग्रन्थ वेद, उपनिषद् र पुराणहरूलाई मनन गरी सर्वव्यापी सूत्रात्मक श्रीकृष्णवचनामृतधारामयी गीताको अध्याय ३ का १० औं र ११ औं श्लोक अनुसारको “ब्रह्माले मानव र यज्ञको सँगै सृष्टि गरेका हुनाले मानवले यज्ञद्वारा देवताहरूलाई प्रसन्न बनाई निरन्तर उन्नति प्राप्त गरुन् र मनले चाहेको फल पाउन्, साथै यज्ञद्वारा खुसी बनाइएका देवताहरूले मानव जातिलाई श्रीवृद्धि गरी उन्नत बनाइरहनेछन् तथा देवता र मानव जातिले निस्वार्थ भावद्वारा पारस्परिक रूपमा परम कल्याण प्राप्त गरुन भन्ने उद्घोषलाई आधार मानेर पूर्ण शास्त्रीय विधिको अनुसरण गरी यो विराट् महायज्ञ सम्पन्न गर्ने योजना रहेको आयोजकले जनाएको छ ।

विराट् महायज्ञमा अठारै पुराणहरूमध्ये धर्म, अर्थ काम र मोक्ष चारै पुरुषार्थ प्रदान गर्ने श्रीमद्देवीभागवत पुराणको पाठ–पारायण र कथा प्रवचन गर्ने मुख्य कार्य रहेको छ भने जगतका परम कल्याणकारक आशुतोष शिवजीको पूजा गरी महारुद्र ११ आवृत्ति गरिने रूद्रीलाई ११ ले गुणन गर्दा हुने १२१ आवृत्तिको लघुरुद्री र त्यसलाई पनि ११ ले गुणन गर्दा हुने १३३१ आवृत्ति (११ वटा लघु रुद्री) सम्पन्न गर्दा महारुद्र हुने भएको र यस्तो महारुद्र गर्दा धनलक्ष्मी प्राप्त हुने सोमयागको फल प्राप्त हुने र सम्पूर्ण मन्त्र लिन अधिकारी बन्ने सबै किसिमका पापको नाश हुने भएकोले यस महारुद्रको अनुष्ठान गरिने भएको छ । साथै, देशमा उत्पन्न राजकीय उपद्रव, दुर्भिक्ष (भोकमरी), भूकम्प अतिवृष्टि अनावृष्टि शत्रुभय असाध्य महारोग शान्त भई धन सन्तान र सर्वसम्पत्ति प्रदान गर्ने शतचण्डी सहित नवार्ण मन्त्रको ९ लाख जप र हवन गरिने कार्यक्रम रहेको छ ।

श्री विन्ध्यवासिनी आध्यात्मिक संघ (जगदाचार्य पीठ) को स्थापना वि.सं. २०४१ म भएको थियो । त्यस आराध्य भूमिमा नेपाली बाबाले वि.सं. २०६१ सालमा ४ लाख गणपति सहस्रनामको पारायण पूर्वक श्री गणपति महायज्ञ, वि.सं. २०७२ मा दैवी प्रकोप शान्त गर्न ४ करोड गणेश सहस्र नामको पारायण गरी ४ लाख लड्डु हवन गर्ने कार्यजस्ता ठुला यज्ञहरू सम्पन्न गरी २८ रोपनी जग्गा जोडर संस्थाको नाममा राख्नुभएको थियो । यस स्थानमा जगन्माता विन्ध्यवासिनी देवीको श्रीयन्त्रमय मन्दिर निर्माण गर्न जगदाचार्य नेपाली बाबाले लिनुभएको संकल्प अनुसारको कार्य अगाडि बढिरहेको सन्दर्भमा यस विराट महायज्ञको आयोजना गरिएको आयेजकले जनाएको छ ।