२ पुस/ अर्थ र व्यापार   - कर्मचारी क्षमता अभिवृद्धिका लागि नेपाल वायुसेवा निगमले आइतबारदेखि कुलेश्वरस्थित आफ्नै भवनमा तालिम केन्द्र सञ्चालनमा ल्याएको छ । भवनमा प्रशासन, इन्जिनियरिङ, अपरेटिङलगायत सबै किसिमका तालिम दिइने निगमका प्रवक्ता अशोक सिग्देलले जानकारी दिए ।

भवनमा रहेको तीनवटा कोठामा कर्मचारीलाई तालिम दिइने उनले जानकारी दिए । उनका अनुसार एक पटकमा ६० जनासम्म कर्मचारीलाई तालिम दिन सकिनेछ । हाल नेपाल वायुसेवा निगममा १४ सय भन्दा धेरै कर्मचारी कार्यरत छन् । 

कुलेश्वरस्थित यो भवन निगमले दुई वर्षअघि आफ्नो स्वामित्वमा ल्याएको थियो । दुई वर्ष अघि एक ट्राभल एजेन्टले नेपाल वायुसेवा निगमलाई टिकट बिक्री गरेबापत तिर्नुपर्ने दुई करोड भन्दा बढी रकम नबुझाएपछि निगमले सर्वच्च अदालतको फैसलाअनुसार उक्त भवन प्राप्त गरेको हो । करिब आठ आना जग्गामा रहेको चार तल्ले भवनमा तीनवटा कोठामा तालिम कक्ष राखिने र बाँकी कोठाहरु कार्यालयको प्रयोजनमा ल्याइने निगमले जनाएको छ ।