८ पुस/अर्थ र व्यापार– साउथवेस्टन स्कुलले ‘प्रतिष्ठित अन्तराष्ट्रिय विद्यालय’ विधाअन्तर्गतको उत्कृष्ट अन्तर्राष्ट्रिय स्कुल अवार्ड प्राप्त गरेको छ ।

‘शिक्षामा उत्कृष्टताका लागि अन्तर्राष्ट्रि केन्द्र’ र ‘कला, संस्कृति र शिक्षाको स्थिरताको लागि समाज’को संयुक्त आयोजनामा डिसेम्बर २०, २०२० मा भारतको नयाँ दिल्लीबाट भर्चुअलरुपमा सञ्चालित ‘अन्तर्राष्ट्रिय शिक्षाशिखर सम्मेलन र पुरस्कार’ कार्यक्रममा साउथवेस्टन स्कुललाई ‘अन्तर्राष्ट्रिय स्कुल अवार्ड’ प्रदान गरिएको हो ।

कोभिड १९ को असरले विद्यालयहरू बन्द रहेको अवस्थामा स्कुलले भर्चुअल शिक्षण प्रक्रियामा अपनाएका शिक्षण पद्धतिहरू, परियोजनामूलक कार्य, श्रव्यदृष्य कक्षा, मौखिक तथा लिखित नियमित मूल्याङकन पद्धति, विद्यालयको भौतिकपूर्वाधार, विद्यालयका उपलब्धि आदिलाई मूल्यङ्कनको आधार बनाई उक्त अवार्ड साउथवेस्टन स्कुललाई प्रदान गरिएको हो ।

कार्यक्रममा नेपाल, भारत, फिलिपिन्स, नाइजेरिया, मलेसिया, इन्डोनेसिया, साउदी अरेयिबा, मेक्सिको, थाइल्यान्ड लगायत ५० भन्दा बढी देशका २५० भन्दा बढी संस्था तथा व्यक्तिहरूको सहभागिता रहेको थियो ।

‘पोस्ट कोभिड परिदृष्यमा जीवन र आजीविकाको लागि समग्र शिक्षा– अगाडिको बाटो’ विषयबस्तुमा आयोजित उक्त सम्मेलनमा ‘योग्य सम्पन्न शैक्षिक संस्थाहरूका लागि विशिष्ट पुरस्कार’ भन्ने नाराका साथ विभिन्न विधाका पुरस्कारहरू वितरण गरिएको थियो ।

भर्चुअल कार्यक्रममा साउथवेस्टन स्कुलको तर्फबाट स्कुलका प्रिन्सिपल रमेश अधिकारी सहभागी भएका थिए । यो अवार्डसंगै एक बर्षको अवधिमा यस स्कुलले प्राप्त गरेको तेस्रो अन्तर्राष्ट्रिय अवार्ड हो । 

स्कुल सञ्चालन समितिका अध्यक्ष टीकाराम महराले स्कुलले प्रदान गर्ने अन्तराष्ट्रिय स्तरको गुणस्तरीय शिक्षाको कारणले गर्दा स्कुलले अवार्ड प्राप्त गर्न सफल भएको बताए ।

यसअघि विद्यालयले २०१९ डिसेम्बरमा दुबईको अमिट युनिभर्सिटीद्वारा दुबईमा आयोजित एक कार्यक्रममा अन्तर्राष्टिय स्कुल अवार्ड अन्तर्गत साउथवेस्टन स्कुलले एक्सिलेन्स टिचिङ अवार्ड प्राप्त गरेको थियो ।

त्यस्तै ‘ग्लोबल स्कुल अवार्ड’ र ‘इडु नेसन टिभी’द्वारा १२ अक्टोबर २०२० मा आयोजित एसियाको पहिलो भर्चुअल अन्तर्राष्ट्रिय सभामा साउथवेस्टन स्कुलका प्रिन्सिपल रमेश अधिकारीले ‘ग्लोबल स्कुल अवार्ड’ अन्तर्गत ‘बेस्ट प्रिन्सिपल २०२०’ प्राप्त गरेको थियो ।