२७ आषाढ/अर्थ र व्यापार– शेरबहादुर देउवा नेतृत्वको सरकारले नियुक्ति गरेका पदाधिकारीहरुलाई ओली सरकारले बर्खास्ती गरेपछि सर्वोच्चमा परेकामध्ये तीन पदाधिकारीको रिटमाथि आज सुनुवाइ हुँदैछ ।

सरकारले सामूहिक निर्णयबाट निर्वाचन आचारसंहिता लागू भई वर्तमान सरकार गठन नभएसम्मका राजनीतिक नियुक्ति खारेजीको निर्णय गरेको थियो । 

गत बुधबारको मन्त्रिपरिषद्ले शेरबहादुर देउवा नेतृत्वको सरकारले गरेका सबै राजनैतिक नियुक्ति बदर गरेको थियो । नियुक्ति बदरपछि मंगलबार पाँच पदाधिकारीले सर्वोच्चमा रिट दायर गरेका थिए । जसमा आज दूरसञ्चार प्राधिकरणका अध्यक्ष दिगम्बर झा, गोरखापत्र संस्थाका महाप्रबन्धक वसन्तप्रकाश उपाध्याय र राष्ट्रिय सहकारी बोर्डका सहध्यक्ष दक्ष पौडेलको रिटमा सुनुवाइ हुँदैछ ।

उनीहरूले प्राकृतिक न्यायको सिद्धान्त विपरीत सुनुवाइको सामान्य मौका समेत नदिई नियुक्ति बदर गरेको भन्दै रिट दायर गरेका हुन् ।

न्यायाधीश ओमप्रकाश मिश्रको एकल इजलासमा रिटको पेसी तोकिएको छ । अदालतले अन्तरिम आदेश जारी गरेको खण्डमा सरकारको निर्णय कार्यान्वयनमा रोक लाग्नेछ ।